நாட்டின் பாதுகாப்பு முதலீட்டு முகவர் அமைப்பை (Defence Investment Agency ) சுயாதீன அதிகாரங்கள் கொண்ட அரச கூட்டுத்தாபனமாக (Crown Corporation) மாற்றுவதற்கான புதிய சட்டமூலம், நாடாளுமன்றத்தில் சமர்ப்பிக்கப்பட்டுள்ளது.
கனேடிய ராணுவத்துக்கான தளவாடக் கொள்முதல் செயல்முறையை விரைவுபடுத்தும் நோக்கிலேயே, இந்த சட்டமூலம் உருவாக்கப்பட்டுள்ளது.
‘C-40 சட்டமூலம்’ (Bill C-40) எனக் குறிப்பிடப்படும் இப்புதிய சட்ட வரைவு, தற்போது பொதுச் சேவைகள் மற்றும் கொள்முதல் அமைச்சகத்தின் கீழ் இயங்கிவரும் பாதுகாப்பு முதலீட்டு முகவர் அமைப்புக்கு மேலதிக அதிகாரங்களையும் சுதந்திரத்தையும் வழங்கும் வகையில் உருவாக்கப்பட்டுள்ளது.
இப் புதிய மாற்றத்தின் மூலம், பாதுகாப்புத் துறையில் சர்வதேச நிறுவனங்களுடன் நேரடியாக ஒப்பந்தப் பேச்சுவார்த்தைகளை நடத்தும் அதிகாரம், முக்கிய பாதுகாப்புத் துறைகளில் முதலீடு செய்யும் உரிமை மற்றும் இராணுவக் கொள்முதல்களை விரைவாக முன்னெடுக்கும் அதிகாரங்கள் முதலானவை இக்கூட்டுத்தாபனத்திற்கு வழங்கப்படும்.
‘கனடிய பாதுகாப்பு முதலீட்டு கூட்டுத்தாபனம்’ (Canadian Corporation for Defence Investment) எனப் பெயரிடப்படவுள்ள இந்த அமைப்பு, நாடாளுமன்றத்தின் ஒப்புதலுக்குப் பிறகு புதிதாக நியமிக்கப்படவுள்ள பாதுகாப்பு இணை அமைச்சரின் கீழ் இயங்கும் என அறிவிக்கப்பட்டுள்ளது.
இதற்கென, தனியான பணிப்பாளர் சபையினரும் தலைமை நிர்வாக அதிகாரியும் (CEO) நியமிக்கப்படவுள்ளமை குறிப்பிடத் தக்கது.
