இயக்குநர் பாலாஜி தரணீதரன் இயக்கத்தில் நடிகர் விஜய் சேதுபதி நடிப்பில் வெளியாகியுள்ள ‘பத்தா’ திரைப்படத்தை இயக்குநர் சங்கர் பாராட்டியுள்ளார்.
சீதக்காதி, நடுவுல கொஞ்சம் பக்கத்த காணோம் ஆகிய படங்களைத் தொடர்ந்து பாலாஜி தரணீதரன் – விஜய் சேதுபதி கூட்டணியில் உருவாகியுள்ள இத்திரைப்படம் குறித்து சமூக வலைதளப் பதிவொன்றை இயக்குநர் சங்கர் வெளியிட்டுள்ளார்.
அதில், ‘பத்தா’ திரைப்படம் நல்ல கதை, மனிதநேயம், சிறந்த நகைச்சுவை மற்றும் படம் முழுவதும் கைதட்டல் பெறத் தகுதியான தருணங்களைக் கொண்ட ஒரு அழகான திரைப்படம் எனக் குறிப்பிட்டுள்ளார்.
மேலும், மிகச் சிறந்த நடிகர்தேர்வு மற்றும் நடிப்புடன், ஒவ்வொரு முகத்தின் ‘க்ளோஸ்-அப்’ காட்சிகளும் மிக அருமையாக உள்ளதாக அவர் தெரிவித்துள்ளார்.
படத்தில் விஜய் சேதுபதி மிகச்சிறந்த மற்றும் உணர்வுப்பூர்வமான நடிப்பை வழங்கியுள்ளதாகக் குறிப்பிட்டுள்ள சங்கர், படத்தில் நடித்துள்ள சிறுவன் சாய் பிரித்விராஜ் தேசிய விருது பெறத் தகுதியானவன் என்றும் பாராட்டியுள்ளார்.
கதாநாயகியாக நடித்துள்ள லிஜோமோல் ஜோஸ் மிகவும் இயல்பாகவும் நேர்த்தியாகவும் நடித்துள்ளதாகவும், சாய் அபயங்கரின் பின்னணி இசை காட்சிகளை வேறொரு உயரத்திற்கு கொண்டு செல்வதாகவும் அவர் கூறியுள்ளார்.
அப்பாவித்தனமும் உணர்ச்சிகளும் நிறைந்த பல நெகிழ்ச்சியான தருணங்கள் படத்தில் உள்ளதாகத் தெரிவித்துள்ள அவர், இத்தகைய தரமான வெற்றிப் படத்தை தயாரித்ததற்காக தயாரிப்பாளர்களுக்கு வாழ்த்துகளைத் தெரிவித்துள்ளார்.
அத்துடன், இது பாலாஜி தரணீதரனிடமிருந்து மற்றொரு மறக்க முடியாத திரைப்படம் என்றும் குறிப்பிட்டுள்ளார்.
இப்படத்தில் விஜய் சேதுபதியுடன் லிஜோமோல் ஜோஸ், குழந்தை நட்சத்திரம் சாய் பிரிதிவ் ராஜ் ஆகியோர் முக்கிய கதாபாத்திரங்களில் நடித்துள்ளனர்.
அட்லீயின் ஏ ஃபார் ஆப்பிள் ஸ்டுடியோஸ், ஸ்டார் ஸ்டுடியோ 18 மற்றும் சினி 1 ஸ்டுடியோஸ் ஆகிய நிறுவனங்கள் இணைந்து தயாரித்துள்ள இத்திரைப்படத்திற்கு சாய் அபயங்கர் இசையமைத்துள்ளார்.
