இயக்குநர் வெற்றிமாறன் இயக்கத்தில், கலைப்புலி எஸ். தாணுவின் வி கிரியேஷன்ஸ் தயாரிப்பில் நடிகர் சிலம்பரசன் டி.ஆர். நடித்து வரும் பிரம்மாண்டத் திரைப்படம் ‘அரசன்’.
ரசிகர்கள் மத்தியில் மிகப்பெரிய எதிர்பார்ப்பை ஏற்படுத்தியுள்ள இத்திரைப்படத்திற்கு பிரபல இசையமைப்பாளர் அனிருத் இசையமைக்கிறார்.
தற்போது இத்திரைப்படத்தின் படப்பிடிப்பு பணிகள் சென்னை தரமணியில் பிரம்மாண்டமாக அமைக்கப்பட்டுள்ள பிரத்யேக அரங்கில் மிகவும் விறுவிறுப்பாகவும், திட்டமிட்டபடியும் நடைபெற்று வருகிறது.
இந்நிலையில், ‘அரசன்’ படப்பிடிப்பு தளத்தில் நடிகர் சிலம்பரசன் டி.ஆர்., இயக்குநர் வெற்றிமாறன் மற்றும் இசையமைப்பாளர் அனிருத் ஆகிய மூவரும் நேரில் சந்தித்துப் படத்தின் முன்னேற்றம் மற்றும் இசைப்பணிகள் குறித்து ஆலோசித்துள்ளனர்.
இந்த சந்திப்பின்போது எடுக்கப்பட்ட புகைப்படம் தற்போது சமூக வலைதளங்களில் வெளியாகி ரசிகர்கள் மத்தியில் தீயாய் பரவி இணையத்தில் வைரலாகி வருகிறது.
இவர்களது கூட்டணி படத்திற்கான எதிர்பார்ப்பை மேலும் பல மடங்கு உயர்த்தியுள்ளது.
பிரபல வெற்றித் திரைப்படமான ‘வடசென்னை’ கதைக்களத்தின் பின்னணியில் உருவாகி வரும் இப்படத்தில் ஆண்ட்ரியா, சமுத்திரக்கனி, கிஷோர் உள்ளிட்ட பல முன்னணி நட்சத்திரங்கள் முக்கியக் கதாபாத்திரங்களில் நடித்து வருகின்றனர்.
படப்பிடிப்பு எவ்வித தொய்வுமின்றி வேகமாக நடைபெற்று வருவதால், ‘அரசன்’ படத்தின் அடுத்தடுத்த முக்கிய அறிவிப்புகள் மற்றும் அப்டேட்கள் விரைவில் வெளியாகும் என எதிர்பார்க்கப்படுகிறது.
