சென்னை: வெள்ளப்பெருக்கு ஏற்படக்கூடிய பகுதிகள் மற்றும் கடல் நீர் புகும் அபாயமுள்ள கடலோரக் கிராமங்களை அடையாளம் காணுமாறு மாநில அதிகாரிகளுக்கு முதலமைச்சர் சி. ஜோசப் விஜய் உத்தரவிட்டுள்ளார்.
தலைமைச் செயலகத்தில் தலைமைச் செயலாளர் எம். சாய் குமார் மற்றும் மூத்த அதிகாரிகளுடன் பருவமழை முன்னெச்சரிக்கை நடவடிக்கைகள் குறித்த ஆய்வுக் கூட்டத்திற்குத் தலைமை தாங்கியபோதே அவர் இந்த உத்தரவை வழங்கினார்.
மீனவர்களுக்கும் தாழ்வான பகுதிகளில் வாழும் மக்களுக்கும் வானிலை மற்றும் கடல்சார் எச்சரிக்கைகளை உடனுக்குடன் தெரிவிக்க நடவடிக்கை எடுக்குமாறு அவர் உத்தரவிட்டார்.
அத்துடன், முறையான வெளியேற்றத் திட்டங்கள், புயல் நிவாரண முகாம்கள் மற்றும் பன்முக நிவாரண மையங்களை தயார்நிலையில் வைக்குமாறும் கேட்டுக்கொண்டார்.
மாவட்ட ஆட்சியர்கள், பாடசாலைகள் மற்றும் சமுதாயக் கூடங்களில் தடையற்ற குடிநீர், உணவு, மின்சாரம், சுகாதாரம் மற்றும் மருத்துவ வசதிகளை உறுதி செய்து, அவற்றை நிவாரண முகாம்களாகப் பயன்படுத்தத் தயாராக வைத்திருக்குமாறு முதலமைச்சர் அறிவுறுத்தினார்.
மேலும், படகுகள், உயிர்காக்கும் மிதவைகள், கயிறுகள், மின் உற்பத்திக் கருவிகள் மற்றும் நீர் இறைக்கும் பம்புகளுடன் கூடிய மீட்புக் குழுக்களை மாவட்ட அளவில் தயார்நிலையில் வைத்திருக்குமாறும் அவர் வலியுறுத்தினார்.
டெங்கு காய்ச்சல் பரவலைத் தடுப்பது குறித்துப் பேசிய முதலமைச்சர், வீடு வீடாகச் சென்று ஆய்வு நடத்தவும், ஏடிஸ் கொசுக்களின் லார்வாக்களை அழிக்கவும், புகை தெளிக்கவும் (fogging) உத்தரவிட்டார்.
அரச வைத்தியசாலைகள் மற்றும் ஆரம்ப சுகாதார நிலையங்களில் நோயறிதல் கருவிகள், தீவிர சிகிச்சைக்கான பயிற்சி பெற்ற ஊழியர்கள் மற்றும் தொடர்ச்சியான நோயாளி கண்காணிப்பு வசதிகளை ஏற்படுத்துமாறு ஆணையிட்டார்.
இக்கூட்டத்தில் வருவாய் மற்றும் பேரிடர் மேலாண்மைத் துறை அமைச்சர் கே. ஏ. செங்கோட்டையன், எல் நினோ காலநிலை போக்குகள் குறித்த பேரிடர் மேலாண்மை நிபுணர் ஆலோசனைக் குழுவின் ஆரம்ப அறிக்கையைச் சமர்ப்பித்தார்.
இதில் அமைச்சர்கள் என். ஆனந்த், ஆதவ் அர்ஜுனா, சி. டி. ஆர். நிர்மல்குமார், பி. வெங்கடராமன், ஆர். வினோத், ஸ்ரீநாத் மற்றும் டெல்டா, கடலோர மாவட்டங்களின் ஆட்சியர்களும் கலந்துகொண்டனர்.
