கியூபெக் (Quebec) மாகாணத்தில் அண்மையில் நடைபெற்ற தேர்தலில் வாக்களித்த மக்களில் சுமார் 40 சதவீதமானோர் தேர்தல் தொடர்பான தகவல்களைப் பெறுவதற்கு செயற்கை நுண்ணறிவு (AI) சாட்பாட்களைப் பயன்படுத்தியதாகவும், எனினும் அவர்களுக்குப் பல தவறான தகவல்களே கிடைத்திருப்பதாகவும் கனடிய நாடாளுமன்றக் குழுவின் கவனத்திற்கு கொண்டுவரப்பட்டுள்ளது.
கனடிய நாடாளுமன்றத்தின் கீழ்-அவையின் நடைமுறைகள் மற்றும் விவகாரங்களுக்கான குழு, ஜனநாயக நிறுவனங்களில் செயற்கை நுண்ணறிவின் தாக்கம் குறித்து நடாத்திய ஆய்வுக் கூட்டத்திலேயே இந்தத் தகவல்கள் வெளியாகியுள்ளன.
கியூபெக் தேர்தல் காலத்தில் சாட்பாட்களின் செயல்பாடுகளைக் கண்காணித்து ஆய்வு மேற்கொண்ட மெக்கில் (McGill) பல்கலைக்கழகத்தைச் சேர்ந்த அரசியல் ஆய்வாளர் ஏங்கஸ் பிரிட்ஜ்மேன் (Aengus Bridgman) இக்குழு முன்னிலையில் சாட்சியமளித்துள்ளார்.
“கியூபெக்கிலுள்ள பெரும்பாலான முன்னணி செய்தி நிறுவனங்கள், தமது செய்திகளையும் தகவல்களையும் செயற்கை நுண்ணறிவுக் கருவிகள் அனுமதி இன்றி பயன்படுத்துவதைத் தடுக்கும் வகையில், அணுகல் உரிமைகளை முடக்கியுள்ளன” என ஏங்கஸ் பிரிட்ஜ்மேன் தெரிவித்தார்.
இதன் காரணமாக, AI சாட்பாட்கள் துல்லியமான செய்தி ஆதாரங்களைப் பெற முடியாமல் போயுள்ளதாகவும், நம்பகத்தன்மையற்ற பிற இணையதளங்களைச் சார்ந்து இயங்கும் நிலை உருவாகியுள்ளதாகவும் அவர் கூறினார்.
மேலும், கியூபெக் தேர்தலின்போது அரசியல் கட்சிகளைப் பரிந்துரைப்பது தொடர்பில் ChatGPT தனது நிலைப்பாட்டை அடிக்கடி மாற்றிக்கொண்டதாகவும், ஒரு நாள் ஒரு கட்சியைப் பரிந்துரைத்தால் மறுநாள் அக்கட்சியைப் பரிந்துரைக்க மறுத்ததாகவும் அவர் சுட்டிக்காட்டினார்.
இதேவேளை, மெக்கில் பல்கலைக்கழகத்தின் பொதுக் கொள்கைப் பள்ளியின் இணைப் பேராசிரியர் டெய்லர் ஓவன் (Taylor Owen) சாட்சியம் அளிக்கையில், “கியூபெக் தேர்தல் பிரசாரத்தின் இறுதி மூன்று வாரங்களில் ChatGPT வழங்கிய வாக்களிப்பு ஆலோசனைகளில் 39 சதவீதமானவை, AI தொழில்நுட்பத்தால் இயக்கப்பட்ட பிழைகள் நிறைந்த பொழுதுபோக்கு இணையதளம் ஒன்றிலிருந்தே பெறப்பட்டிருந்தன” எனச் சுட்டிக்காட்டினார்.
இதில் தனிநபர்களுக்கோ அல்லது சாட்பாட்களுக்கோ எந்தவொரு தீய நோக்கமும் இருக்கவில்லை என்றும், இந்தச் சூழ்நிலையின் காரணமாக பெருவாரியான கியூபெக் மக்கள் தவறான தேர்தல் தகவல்களைப் பெறும் நிலை ஏற்பட்டது என்றும் பேராசிரியர் டெய்லர் ஓவன் விளக்கமளித்தார்.
இந்த சாட்சியங்களுக்குப் பதிலளித்த கன்சர்வேடிவ் கட்சி நாடாளுமன்ற உறுப்பினர் பிளேன் கால்கின்ஸ் (Blaine Calkins), “தற்செயலாகவே செயற்கை நுண்ணறிவு மூலமாக இவ்வளவு பெரிய தவறு நடக்குமாயின், யாராவது திட்டமிட்டுச் செய்தால், அதன் ஆபத்து எவ்வாறிருக்கும் என்பதை நினைத்துப் பார்க்கவே அச்சமாக உள்ளது” எனக் கவலை வெளியிட்டார்.
