இந்தியாவின் டெல்லியில் ஜந்தர் மந்தரில் நடைபெற்ற போராட்டத்தின்போது, பொலிஸாரால் பாலியல் துன்புறுத்தலுக்கு உள்ளாக்கப்பட்டதாக மூன்று பெண் ஊடகவியலாளர்கள் முறைப்பாடு அளித்துள்ளனர்.
தலைமைத் தேர்தல் ஆணையாளர் ஞானேஷ் குமாருக்கு எதிராக நேற்று ஜந்தர் மந்தரில் நடைபெற்ற போராட்டத்தின்போது இந்த சம்பவம் இடம்பெற்றதாக குறித்த ஊடகவியலாளர்கள் குற்றம் சாட்டியுள்ளனர்.
வாக்காளர் பட்டியல் சிறப்புத் தீவிரத் திருத்தப் பணிகளில் சட்டவிரோதமாக செயற்பட்டதாகக் குற்றம் சாட்டப்பட்டுள்ள தலைமைத் தேர்தல் ஆணையாளர் ஞானேஷ் குமார் பதவி விலக வேண்டும் என வலியுறுத்தி, இந்தியாவின் பல்வேறு மாநிலங்களில் போராட்டங்கள் முன்னெடுக்கப்பட்டு வருகின்றன.
இதன் ஒரு பகுதியாக, கடந்த 2 ஆம் திகதி டெல்லியில் உள்ள ஜந்தர் மந்தரை நோக்கி மாணவர்கள், இளைஞர்கள், அரசியல் தலைவர்கள் மற்றும் பொதுமக்கள் உள்ளிட்ட பலர் பேரணியாகச் சென்றனர்.
இதனைத் தொடர்ந்து, 3 ஆம் திகதி ஜந்தர் மந்தரில் போராட்டம் தொடர்ந்துள்ளது. இதன்போது பாதுகாப்புப் பணியில் ஈடுபட்டிருந்த பொலிஸ் அதிகாரிகள் தங்களைத் தவறான முறையில் தொட்டதாகவும், அநாகரீகமாக நடந்துகொண்டதாகவும் மூன்று பெண் ஊடகவியலாளர்கள் சமூக வலைத்தளங்களில் காணொளி ஆதாரங்களுடன் குற்றம் சாட்டியுள்ளனர்.
இதனை அடுத்து, குறித்த மூன்று ஊடகவியலாளர்களும் பொலிஸில் முறைப்பாடு செய்துள்ளனர்.
இந்நிலையில், நியாயமான விசாரணையை முன்னெடுக்கும் நோக்கில், குறித்த முறைப்பாடுகள் மாவட்ட பொலிஸாரிடமிருந்து டெல்லி குற்றப்பிரிவுக்கு மாற்றப்பட்டுள்ளதாக பொலிஸ் அதிகாரி ஒருவர் தெரிவித்துள்ளார்.
இந்த சம்பவம் தொடர்பாக ஊடகவியலாளர் அமைப்புகள் மற்றும் மாணவர் அமைப்புகள் உள்ளிட்ட பல்வேறு தரப்பினர் பொலிஸாரின் நடவடிக்கைக்கு கண்டனம் தெரிவித்து வருகின்றனர்.
