முன்னாள் அதிபர் பராக் ஒபாமா ஜனநாயகக் கட்சியினருக்காகப் பிரசாரம் செய்த மறுநாளே, அமெரிக்க அதிபர் டொனால்ட் டிரம்ப் மிச்சிகனின் கிழக்குப் பகுதியில் ஞாயிற்றுக்கிழமை (25.10.2026) குடியரசுக் கட்சியினரைத் திரட்டிப் பிரசாரம் மேற்கொள்கிறார்.
இது அடுத்த வாரம் நடைபெறவுள்ள இடைத்தேர்தலில் அம்மாநிலத்தின் முக்கியத்துவத்தை உணர்த்துகிறது.
மிச்சிகனில் முன்னாள் குடியரசுக் கட்சிப் பிரதிநிதி மைக் ரோஜர்ஸ் (Mike Rogers) மற்றும் ஜனநாயகக் கட்சி வேட்பாளர் அப்துல் எல்-சயீத் (Abdul El-Sayed) ஆகியோருக்கு இடையே அமெரிக்க செனட் சபைக்கான கடும் போட்டி நிலவுகிறது.
அப்துல் எல்-சயீத் வெற்றி பெற்றால், அமெரிக்க செனட் சபைக்குத் தேர்ந்தெடுக்கப்பட்ட முதல் முஸ்லிம் என்ற பெருமையைப் பெறுவார்.
டிரம்ப், அப்துல் எல்-சயீதை ஒரு தீவிரவாதியாகச் சித்தரிக்க முயன்றதுடன், அவரின் நடுப்பெயரான முகமட் என்பதைக் கேலி செய்துள்ளார்.
எனினும், எல்-சயீத் இந்தக் குற்றச்சாட்டுகளை நிராகரித்துள்ளார்.
மறுபுறம், மைக் ரோஜர்ஸ் எல்-சயீதுக்கு முஸ்லிம் பிரதர்ஹுட் அமைப்புடன் தொடர்பு இருப்பதாக எவ்வித ஆதாரமுமின்றி குற்றம் சாட்டியுள்ளார்.
இதற்குப் பதிலளித்துள்ள எல்-சயீத், தன் மீதான குற்றச்சாட்டுகளை மறுத்ததுடன், தனது அமெரிக்க விசுவாசத்தைக் கேள்வி கேட்பது வெட்கக்கேடானது எனக் குறிப்பிட்டுள்ளார்.
சனிக்கிழமை (24.10.2026) டெட்ராய்ட்டில் நடைபெற்ற கூட்டத்தில் பேசிய பராக் ஒபாமா, எல்-சயீத் மீதான தாக்குதல்கள் அவரை குறைந்த தேசபக்தி கொண்டவராகக் காட்ட முனையும் முயற்சி என்று விமர்சித்தார்.
2024 அதிபர் தேர்தலில் டிரம்ப் 66 சதவீதத்திற்கும் அதிகமான வாக்குகளைப் பெற்ற போர்ட் ஹுரோன் (Port Huron) பகுதியில் நடைபெறும் இந்த பிரசாரக் கூட்டத்தில், அமெரிக்க-கனடா வரி விதிப்புப் பிரச்சினை முக்கியத்துவம் பெறும்.
வர்த்தக மோதலால் டெட்ராய்ட்டை மையமாகக் கொண்ட அமெரிக்க வாகனத் தொழில் பாதிக்கப்பட்டுள்ளதால், ரோஜர்ஸ் அதிபரின் கொள்கையிலிருந்து விலகியுள்ளார்.
தற்போது அமெரிக்க செனட் மற்றும் பிரதிநிதிகள் சபையில் குடியரசுக் கட்சியினர் முறையே 53-47 மற்றும் 218-214 என்ற பெரும்பான்மையில் உள்ள நிலையில், அதை மாற்ற ஜனநாயகக் கட்சிக்கு இரு சபைகளிலும் தலா நான்கு இடங்கள் தேவையாக உள்ளன.
