மன்னார் பிரதேச செயலாளர் பிரிவுக்குட்பட்ட புதுக்கமம் கிராமத்திற்கு குடிநீர் இணைப்பையும், சீரான நீர் விநியோகத்தையும் வழங்குமாறு கோரி, கிராம மக்கள் இன்று திங்கட்கிழமை மன்னார் மாவட்ட அரசாங்க அதிபரிடம் மகஜர் ஒன்றைக் கையளித்துள்ளனர்.
உயிலங்குளம் புதுக்கமம் மாதர் கிராம அபிவிருத்திச் சங்கத்தின் பிரதிநிதிகள், இன்று காலை மன்னார் மாவட்டச் செயலகத்திற்குச் சென்று மாவட்ட அரசாங்க அதிபர் க. கனகேஸ்வரனைச் சந்தித்து தமது கோரிக்கைகளை முன்வைத்தனர்.
புதுக்கமம் கிராமத்தில் சுமார் 130 குடும்பங்கள் வசித்து வருகின்ற நிலையில், நாளாந்தம் சுத்தமான குடிநீரைப் பெற்றுக்கொள்வதில் மக்கள் பல்வேறு சிரமங்களை எதிர்கொண்டு வருவதாகச் சங்கப் பிரதிநிதிகள் தெரிவித்துள்ளனர்.
குடிநீர் பிரச்சினைக்குத் தீர்வு கோரி, ஏற்கனவே இரண்டு தடவைகள் மன்னார் பிரதேச செயலகத்திற்கு கடிதங்கள் கையளிக்கப்பட்ட போதிலும், இதுவரை உரிய நடவடிக்கைகள் எடுக்கப்படவில்லை எனவும் அவர்கள் கவலை வெளியிட்டுள்ளனர்.
மேலும், தமது கிராமத்திலிருந்து சுமார் ஒரு கிலோமீற்றர் தொலைவிலேயே பிரதான குடிநீர்க் குழாய் அமைந்துள்ளதாகவும், அங்கிருந்து கிராமத்திற்கு குடிநீர் இணைப்பை வழங்குவதற்கான நடவடிக்கைகளை அதிகாரிகள் விரைந்து முன்னெடுக்க வேண்டும் என்றும் கோரிக்கை விடுத்துள்ளனர்.
இந்தக் குடிநீர்ப் பிரச்சினை தொடர்பாக, தமிழ் தேசிய மக்கள் முன்னணியின் மன்னார் பிரதேச சபை உறுப்பினர் லூக்கஸ் சோபனா அலெக்சாண்டரிடம் கிராம மக்கள் கோரிக்கை முன்வைத்திருந்தனர்.
அதன் தொடர்ச்சியாகவே, மாதர் கிராம அபிவிருத்திச் சங்கப் பிரதிநிதிகள் மாவட்ட அரசாங்க அதிபரைச் சந்தித்து மகஜரைக் கையளித்துள்ளனர்.
புதுக்கமம் கிராமத்தில் நீண்டகாலமாக நிலவி வரும் குடிநீர்ப் பிரச்சினைக்குத் தீர்வு காண அதிகாரிகள் விரைந்து நடவடிக்கை எடுக்க வேண்டும் என்பதே மக்களின் பிரதான கோரிக்கையாக உள்ளது.
