புதுக்குடியிருப்பில் சட்டவிரோத மணல் அகழ்வு அதிகரிப்பு – பா.உ.ரவிகரன் கடும் அதிருப்தி

முல்லைத்தீவு – புதுக்குடியிருப்பு பிரதேசத்தில் சட்டவிரோத மணல் அகழ்வு உள்ளிட்ட சட்டவிரோத செயற்பாடுகள் அதிகரித்துள்ளதாக வன்னி மாவட்ட நாடாளுமன்ற உறுப்பினர் துரைராசா ரவிகரன் தெரிவித்துள்ளார்.

பொலிஸாரால் இத்தகைய சட்டவிரோத செயற்பாடுகளை கட்டுப்படுத்த முடியாவிட்டால், பொலிஸாரின் ஆயுதங்களை இளைஞர், யுவதிகளிடம் ஒப்படைத்தால் அவர்கள் அவற்றைக் கட்டுப்படுத்துவார்கள் எனவும் அவர் தெரிவித்துள்ளார்.

புதுக்குடியிருப்பு பிரதேச அபிவிருத்தி ஒருங்கிணைப்புக்குழுக் கூட்டம் நேற்று இடம்பெற்றபோது, பிரதேசத்தில் அதிகரித்துள்ள சட்டவிரோத மணல் அகழ்வு தொடர்பில் கலந்துரையாடப்பட்டது.

விசுவமடு நெத்தலியாறு தொடக்கம் மன்னாகண்டல், கெரடமடு பகுதிகள் வரையில் சட்டவிரோத மணல் அகழ்வு அதிகளவில் இடம்பெறுவதாக புதுக்குடியிருப்பு பிரதேச செயலாளர் தெரிவித்துள்ளார்.

சட்டவிரோத மணல் அகழ்வில் ஈடுபடுபவர்களுக்கு எதிராக பொலிஸார் நடவடிக்கை எடுத்தாலும், அதையும் மீறி இச்செயற்பாடுகள் தொடர்வதாகவும் அவர் கூறியுள்ளார்.

மேலும், சில பொலிஸ் உத்தியோகத்தர்கள் சட்டவிரோத மணல் அகழ்வில் ஈடுபடுபவர்களிடம் கையூட்டுப் பெறுவதாக பொதுமக்களிடமிருந்து முறைப்பாடுகள் கிடைத்துள்ளதாகவும் பிரதேச செயலாளர் தெரிவித்துள்ளார்.

திருகோணமலை மாவட்டம் புல்மோட்டையில் மணல் அகழ்வதற்கான அனுமதிப்பத்திரங்களைப் பெற்றுள்ள சிலர், புதுக்குடியிருப்பு மன்னாகண்டல் பகுதியில் சட்டவிரோதமாக மணல் அகழ்வில் ஈடுபடுவதாகவும் முறைப்பாடுகள் கிடைத்துள்ளதாக அவர் குறிப்பிட்டுள்ளார்.

இதன்போது கருத்து தெரிவித்த நாடாளுமன்ற உறுப்பினர் துரைராசா ரவிகரன், சட்டவிரோத மணல் அகழ்வு காரணமாக ஆறுகளின் இயற்கையான அமைப்புகள் பாதிக்கப்பட்டுள்ளதாக மக்கள் தமக்கு முறைப்பாடு செய்துள்ளதாகத் தெரிவித்தார்.

மணற்கொள்ளை, மணற்கடத்தல், கிரவல் கொள்ளை, கசிப்பு, கஞ்சா, ஐஸ் உள்ளிட்ட போதைப்பொருள் மற்றும் திருட்டுச் சம்பவங்கள் அதிகரித்துள்ளதாகவும் அவர் கூறினார்.

மேலும், விடுதலைப் புலிகளின் காலத்தில் இவ்வாறான சட்டவிரோத செயற்பாடுகள் இருந்திருக்கவில்லை எனவும், அக்காலத்தில் நள்ளிரவிலும் பெண்கள் பாதுகாப்பாக வெளியே செல்லக்கூடிய நிலை காணப்பட்டதாகவும் அவர் குறிப்பிட்டார்.

எனினும், இத்தகைய வரலாற்றுக் கூற்றுகள் தொடர்பில் தனித்தனி ஆதாரங்கள் முன்வைக்கப்படவில்லை.

இதேவேளை, புதுக்குடியிருப்பு பொலிஸ் நிலையத்தில் 75 வரையான பொலிஸ் உத்தியோகத்தர்கள் பணியாற்றுவதாகவும், பிரதேசத்தில் 19 கிராம அலுவலர் பிரிவுகளில் 50 ஆயிரத்துக்கும் அதிகமான மக்கள் வசிப்பதாகவும் பொலிஸ் பொறுப்பதிகாரி தெரிவித்துள்ளார்.

இந்த ஆண்டு ஜனவரி முதல் இதுவரை கசிப்பு உற்பத்தி தொடர்பாக 702 வழக்குகள் பதிவு செய்யப்பட்டுள்ளதாகவும், கோடா உற்பத்தி தொடர்பாக 45 வழக்குகளும், கஞ்சா தொடர்பாக 25 வழக்குகளும், ஹெரோயின் தொடர்பாக 33 வழக்குகளும் பதிவு செய்யப்பட்டுள்ளதாகவும் அவர் கூறினார்.

அத்துடன், ஐஸ் போதைப்பொருள் தொடர்பாக 91 வழக்குகளும், சட்டவிரோத நாட்டுத் துப்பாக்கிகள் தொடர்பாக 14 வழக்குகளும், சட்டவிரோத மணல் அகழ்வு தொடர்பாக 69 வழக்குகளும், சட்டவிரோத மண் அகழ்வு தொடர்பாக 9 வழக்குகளும் பதிவு செய்யப்பட்டுள்ளதாகவும் பொலிஸ் பொறுப்பதிகாரி தெரிவித்தார்.

சில பொலிஸ் உத்தியோகத்தர்கள் இலஞ்சம் பெறுவதாக குற்றச்சாட்டுகள் இருப்பதை ஏற்றுக்கொண்ட அவர், அனைத்து பொலிஸ் உத்தியோகத்தர்களும் அவ்வாறு செயற்படவில்லை எனவும், குறிப்பிட்ட அதிகாரிகளுக்கு எதிராக தகவல் வழங்கப்பட்டால் நடவடிக்கை எடுக்கப்படும் எனவும் தெரிவித்துள்ளார்.

இதனைத் தொடர்ந்து கருத்து தெரிவித்த ரவிகரன் எம்.பி., சட்டவிரோத செயற்பாடுகளை கட்டுப்படுத்த பொலிஸார் தவறினால், இந்த விவகாரத்தை நாடாளுமன்றத்தில் தொடர்ச்சியாக எழுப்புவதாகத் தெரிவித்தார்.

மேலும், பொலிஸாரால் சட்டவிரோத செயற்பாடுகளை கட்டுப்படுத்த முடியாத நிலை ஏற்பட்டால், அவர்களின் ஆயுதங்களை தங்களிடம் ஒப்படைக்குமாறும், இளைஞர், யுவதிகள் இத்தகைய செயற்பாடுகளை கட்டுப்படுத்துவார்கள் எனவும் அவர் தெரிவித்தார்.

இக்கருத்து, சட்டவிரோத செயற்பாடுகளை கட்டுப்படுத்தும் பொறுப்பு தொடர்பில் கடுமையான அரசியல் விமர்சனத்தை ஏற்படுத்தக்கூடியதாக அமைந்துள்ளது.