ரஷ்யாவின் சைபீரியாவில் உள்ள பிளேக் ஆராய்ச்சி நிலையத்தில் பணியாற்றிய ஊழியர் ஒருவர் உயிரிழந்ததைத் தொடர்ந்து, அந்த நோய்த்தொற்று பரவலை எதிர்கொள்ள ரஷ்யாவிற்கு அமெரிக்கா உதவும் என்று அமெரிக்க அதிபர் டொனால்ட் ட்ரம்ப் தெரிவித்துள்ளார்.
வாஷிங்டனில் உள்ள வெள்ளை மாளிகையிலிருந்து நெப்ராஸ்காவிற்கு புறப்படுவதற்கு முன்னர் செய்தியாளர்களிடம் பேசிய ட்ரம்ப், சைபீரியாவில் ஏற்பட்டுள்ள இந்நோய் பரவல் ரஷ்யாவிற்கு ஒரு பெரிய பிரச்சனை எனக் குறிப்பிட்டார்.
“அவர்கள் இத்தகைய கடினமான நோயால் பாதிக்கப்படுவதை நான் பார்க்க விரும்பவில்லை. இது ஒரு கொடூரமான நோயாகும். இத்தகைய பிரச்சனைகளை எதிர்கொள்ளும் எவருக்கும் உதவ நாங்கள் எப்போதும் தயாராக இருக்கிறோம்” என ட்ரம்ப் தெரிவித்துள்ளார்.
உக்ரைன் போர் காரணமாக பதற்றங்கள் நிலவியபோதிலும், ரஷ்ய அதிபர் விளாடிமிர் புடினுடன் இணைந்து பணியாற்ற முடியும் என ட்ரம்ப் தெரிவித்துவருகின்றமை குறிப்பிடத்தக்கது.
சைபீரியாவில் அமைந்துள்ள பிளேக் ஆராய்ச்சி நிலையத்தில் பணியாற்றிய ஊழியர் ஒருவர் விவரிக்க முடியாத சூழலில் நோய்வாய்ப்பட்டு உயிரிழந்ததைத் தொடர்ந்து, இருநூறுக்கும் அதிகமான நபர்களை ரஷ்ய அதிகாரிகள் தனிமைப்படுத்தியுள்ளனர்.
இச்சம்பவம் சமூக ஊடகங்களில் பொது சுகாதார அச்சத்தை ஏற்படுத்திய போதிலும், நிலைமை முழுமையாகக் கட்டுப்பாட்டுக்குள் உள்ளதாக ரஷ்ய அதிகாரிகள் தெரிவித்துள்ளனர்.
