ஜப்பானின் தெற்குப் பகுதியான ஒகினாவா மாகாணத்தில், பெண் ஒருவரைக் கொலை செய்து கொள்ளையடித்ததாக சந்தேகத்தின் பேரில் 20 வயதுடைய அமெரிக்க கடற்படை வீரர் ஒருவரை பொலிஸார் கைது செய்துள்ளனர்.
நஹா (Naha) நகரில் உள்ள ஹோட்டல் ஒன்றில் 39 வயதுடைய பெண் ஒருவர் உயிரிழந்த நிலையில் சடலமாகக் கண்டெடுக்கப்பட்டதைத் தொடர்ந்து இந்த கைது நடவடிக்கை இடம்பெற்றுள்ளது.
அமெரிக்கக் கடற்படையின் ஃபுட்டென்மா (Futenma) விமான நிலையத்தில் பணியாற்றி வரும் 20 வயதுடைய டெவின் ஜேக்கப் பல்லார்ட் (Devin Jacob Ballard) என்ற வீரரே இவ்வாறு கைது செய்யப்பட்டுள்ளார்.
பாதிக்கப்பட்ட பெண்ணின் பணப்பையை திருடி, அவரைக் கொலை செய்ததாக அவர் மீது குற்றம் சாட்டப்பட்டுள்ளது.
சம்பவம் தொடர்பான கண்காணிப்பு கேமரா (CCTV) பதிவுகளை ஆய்வு செய்த பொலிஸார், சந்தேக நபரை அடையாளம் கண்டு கைது செய்துள்ளனர்.
இருப்பினும், தன் மீதான குற்றச்சாட்டுகளை சந்தேக நபர் மறுத்துள்ளதாக பொலிஸார் தெரிவித்துள்ளனர்.
இச்சம்பவத்தைத் தொடர்ந்து, ஜப்பான் அரசாங்கம் அமெரிக்காவிற்கு தனது பலத்த எதிர்ப்பைப் பதிவு செய்துள்ளது. ஜப்பானில் சுமார் 54,000 அமெரிக்க இராணுவத்தினர் நிலைகொண்டுள்ள நிலையில், அவற்றில் பெரும்பாலானோர் ஒகினாவாவிலேயே முகாம் அமைத்துள்ளனர்.
இந்த சம்பவம் தொடர்பில் ஜப்பானிய அதிகாரிகளுக்கு முழுமையான ஒத்துழைப்பு வழங்கி வருவதாக அமெரிக்க இராணுவம் தெரிவித்துள்ளது.
