இந்திய தலைமைத் தேர்தல் ஆணையர் ஞானேஷ் குமாருக்கு எதிராக 2006ஆம் ஆண்டு எழுந்த ஊழல் மற்றும் முறைகேடு குற்றச்சாட்டுகள் குறித்து விரிவான விசாரணை நடத்துமாறு கேரள மாநில அரசு விஜிலென்ஸ் துறைக்கு உத்தரவிட்டுள்ளது.
ஞானேஷ் குமார் 2006ஆம் ஆண்டு கேரள பொதுப்பணித்துறை (PWD) செயலாளராகப் பணியாற்றிய போது, உலக வங்கி நிதியுதவியுடன் மேற்கொள்ளப்பட்ட வீதி மேம்பாட்டுத் திட்டத்தில் லஞ்சக் குற்றச்சாட்டுகள் எழுந்தன.
இத்திட்டத்தில் பணியாற்றிய மலேசியப் பொறியாளர் ஒருவர் தற்கொலை செய்துகொண்ட சம்பவத்தில் எழுதப்பட்ட தற்கொலைக் குறிப்பில் ஞானேஷ் குமாரின் பெயர் குறிப்பிடப்பட்டிருந்ததாகக் கூறப்படுகிறது.
அக்காலத்தில் இது தொடர்பாக நடத்தப்பட்ட முதற்கட்ட விஜிலென்ஸ் விசாரணை, வெளிப்படைத்தன்மையின்றி பாதியிலேயே கைவிடப்பட்டதாகக் குற்றச்சாட்டு எழுந்தது.
இந்நிலையில், வெளிச் செல்வாக்கு காரணமாக முந்தைய விசாரணை முடக்கப்பட்டதாகக் கூறி அளிக்கப்பட்ட புதிய புகாரின் அடிப்படையில், முழுமையான மறுவிசாரணைக்கு கேரள உள்துறை உத்தரவிட்டுள்ளது.
வாக்காளர் பட்டியல் திருத்த நடவடிக்கை (SIR) தொடர்பான சர்ச்சைகளுக்கு மத்தியில், தலைமைத் தேர்தல் ஆணையர் ஞானேஷ் குமாருக்கு எதிராக 20 ஆண்டுகள் பழமையான இந்த வழக்கு மீண்டும் தூசி தட்டப்பட்டிருப்பது குறிப்பிடத்தக்கது.
