தமிழகத்தின் சென்னை நகரில் இம்மாதம் 24 ஆம் திகதி நடைபெறுகின்ற உலகத்தமிழ் கலை பண்பாட்டுக் கூடத்தின் உலக தமிழர் மாநாட்டு நிகழ்வுகளில் இலங்கையில் இருந்து பிரதம விருந்தினராக கலந்து கொள்ள இருக்கின்ற பெருந்தோட்ட மற்றும் சமூக உட்கட்டமைப்பு வசதிகள் பிரதி அமைச்சர் சுந்தரலிங்கம் பிரதீப் அவர்களுக்கான உத்தியோகபூர்வ அழைப்பிதழ் இன்று (12) கொழும்பில் வைத்து கையளிக்கப்பட்டது.
உலகத் தமிழ் கலை பண்பாட்டுக் கூடத்தின் சர்வதேச தலைவர் கலாநிதி ரஷ்மி ரூமி அவர்களின் வேண்டுகோளின் பேரில் அமைப்பின் இலங்கைக்கான ஆலோசனை சபை தலைவர் புரவலர் ஹாஷிம் உமர் அவர்களுடைய வழி காட்டல்களிளும் அமைப்பின் இலங்கைக்கான பிரதி தலைவர் தொழிலதிபர் ரிசான் ஷேக் அமானி இந்த உத்தியோகபூர்வ அழைப்பிதழை கொழும்பு கொள்ளுப்பிட்டியில் அமைந்துள்ள பிரதி அமைச்சரின் அலுவலகத்தில் வைத்து பிரதி அமைச்சர் இடத்தில் கையளித்தார்.
இவ்வழைப்பிதழை பெற்றுக் கொண்ட பிரதி அமைச்சர் சுந்தரலிங்கம் பிரதீப் அவர்கள் மேற்படி விழாவானது தமிழ் பேசும் அனைத்து மக்களுக்கும் மிகவும் முக்கியமான ஒன்றாக இருக்கும் என்றும் மேற்படி நிகழ்வு வெற்றி பெறுவதற்கு தன்னுடைய வாழ்த்துகளையும் தெரிவிப்பதாக பிரதித் தலைவர் ரிசான் ஷேக் அமானி இடத்தில் குறிப்பிட்டுள்ளார்.
