நாட்டிலிருந்து விஷப் போதைப்பொருட்களை முற்றாக ஒழிக்கும் நோக்கில் அரசாங்கம் முன்னெடுத்து வரும் நடவடிக்கைகளின் ஒரு பகுதியாக, கிளிநொச்சி மாவட்டத்தில் போதைப்பொருள் பாவனையைக் கட்டுப்படுத்துவது தொடர்பான விசேட கலந்துரையாடல் இன்று (14) கிளிநொச்சி மாவட்ட செயலகத்தில் நடைபெற்றது.
பாதுகாப்புப் பிரதி அமைச்சர் சுனில் வட்டகலவின் பங்கேற்புடன் நடைபெற்ற இந்தக் கலந்துரையாடல், கிளிநொச்சி மாவட்ட மேலதிக அரசாங்க அதிபர் நளாயினி இன்பராஜ் தலைமையில் இடம்பெற்றது.
கிளிநொச்சி மாவட்டத்தில் அதிகரித்து வரும் போதைப்பொருள் பாவனை, சிறுவர் துஷ்பிரயோகம், போதைப்பொருள் பாவனையுடன் தொடர்புடைய வீதி விபத்துக்கள் மற்றும் உயிரிழப்புகளைத் தடுப்பது தொடர்பில் இதன்போது பல்வேறு விடயங்கள் கலந்துரையாடப்பட்டன.
குறிப்பாக, பாடசாலை மாணவர்களுக்கு போதைப்பொருட்கள் விநியோகிக்கப்படுவதைத் தடுப்பதற்கான நடவடிக்கைகள் குறித்தும், மாவட்டத்தில் போதைப்பொருள் ஒழிப்புச் செயற்பாடுகளை வலுப்படுத்துவது தொடர்பிலும் கவனம் செலுத்தப்பட்டது.
இந்தக் கலந்துரையாடலில் பொலிஸ் நிலையங்களின் பொறுப்பதிகாரிகள், பிரதேச செயலாளர்கள், பிரதேச சபை உறுப்பினர்கள், பொதுச் சுகாதாரப் பரிசோதகர்கள், பொது அமைப்புகளின் பிரதிநிதிகள், மதகுருமார்கள் உள்ளிட்ட பலர் கலந்துகொண்டனர்.
கிளிநொச்சி மாவட்டத்தில் போதைப்பொருள் பாவனையைக் கட்டுப்படுத்துவதற்கும், இளைஞர்கள் மற்றும் பாடசாலை மாணவர்களை போதைப்பொருள் பாதிப்பிலிருந்து பாதுகாப்பதற்கும் பல்வேறு தரப்பினரின் ஒத்துழைப்புடன் நடவடிக்கைகளை முன்னெடுப்பது தொடர்பில் இதன்போது ஆராயப்பட்டமை குறிப்பிடத்தக்கது.
