யாழ்ப்பாணம் கோப்பாய் பிரதேச செயலகப் பகுதியில், புதிதாக மதுபானசாலை அமைப்பதற்கு அனுமதி வழங்கப்பட்டமைக்கு எதிர்ப்புத் தெரிவித்து கண்டனப் போராட்டமொன்று முன்னெடுக்கப்பட்டுள்ளது.
கோப்பாய் பிரதேச சபையின் முன்பாக இன்றைய தினம் வியாழக்கிழமை(15.10.2026) குறித்த போராட்டம் முன்னெடுக்கப்பட்டது.
யாழ்ப்பாணத்தில் சங்கானை, கோப்பாய், தெல்லிப்பழை மற்றும் கரவெட்டி ஆகிய நான்கு பிரதேச செயலகப் பிரிவுகளுக்கு உட்பட்ட பகுதிகளில், ஒவ்வொரு பிரதேச செயலகப் பிரிவிலும் தலா ஒன்று என்ற அடிப்படையில் புதிதாக நான்கு மதுபானசாலைகளுக்கு அனுமதி வழங்கப்பட்டுள்ளன.
இதன் ஒரு கட்டமாக, தெல்லிப்பழை பிரதேச செயலகப் பிரிவுக்கு உட்பட்ட காங்கேசதுறை பகுதியில் கொடுக்கப்பட்ட மதுபானசாலைக்கான அனுமதியை இரத்து செய்யக் கோரி தெல்லிப்பழை சந்தியில் கடந்த வியாழக்கிழமை போராட்டம் முன்னெடுக்கப்பட்டு, தெல்லிப்பழை பிரதேச செயலகத்திற்குப் பேரணியாகச் சென்று பிரதேச செயலரிடம் மகஜர் கையளிக்கப்பட்டிருந்தது.
இதனைத் தொடர்ந்து வெள்ளிக்கிழமை சங்கானை பிரதேசத்திற்கு வழங்கப்பட்ட மதுபானசாலை அனுமதியினை இரத்து செய்யுமாறு சங்கானை பேருந்து நிலையத்திற்கு முன்பாக போராட்டம் நடத்தப்பட்டு, சங்கானை பிரதேச செயலகத்திற்குச் சென்று பிரதேச செயலரிடமும் மகஜர் கையளிக்கப்பட்டிருந்தது.
அதனைத் தொடர்ந்து கடந்த திங்கட்கிழமை (12.10.2026) கரவெட்டி பிரதேச செயலகத்திற்கு உட்பட்ட நெல்லியடி பகுதியில் மதுபானசாலை அமைப்பதற்கான அனுமதியினை இரத்து செய்யக் கோரி மண்டான் கலைநேசன் சனசமூக நிலையத்திற்கு அருகில் போராட்டம் முன்னெடுக்கப்பட்டு, மண்டானில் அமைந்துள்ள மதுவரித் திணைக்களத்தின் பொறுப்பு அதிகாரியிடம் மகஜர் கையளிக்கப்பட்டிருந்தது.
இந்நிலையில் இன்றைய தினம் வியாழக்கிழமை கோப்பாய் பிரதேச சபை முன்பாக போராட்டம் முன்னெடுக்கப்பட்டமை குறிப்பிடத்தக்கது.
