மன்னார் நகரசபைக்குட்பட்ட பகுதிகளில் மன்னார் நகர பொதுச் சுகாதாரப் பரிசோதகரினால் மேற்கொள்ளப்பட்ட பரிசோதனையின் போது, சுகாதாரமற்ற நிலையில் இயங்கி வந்த உணவகம் ஒன்றில் பல்வேறு சுகாதாரக் குறைபாடுகள் கண்டறியப்பட்டுள்ளன.
குறித்த உணவகத்தில் உணவுப் பொருட்களில் ஈக்கள் காணப்பட்டதுடன், உணவு தயாரிப்பு மற்றும் சேமிப்பு இடங்களிலும் சுகாதாரக் குறைபாடுகள் அவதானிக்கப்பட்டுள்ளன.
மேலும், சுகாதாரமற்ற முறையில் அமைந்த குளிர்சாதனப் பெட்டிகளில் உணவுப் பொருட்கள் சேமிக்கப்பட்டமை, உணவு தயாரிப்பதற்குப் பயன்படுத்தப்படும் பொருட்களைச் சுகாதாரமான முறையில் பராமரிக்காமை மற்றும் கழிவுநீரை முறையற்ற வகையில் வெளியேற்றுதல் உள்ளிட்ட பல்வேறு குறைபாடுகளும் கண்டறியப்பட்டுள்ளன.
அத்துடன், உணவு தயாரிப்பில் ஈடுபடுவோர் உரிய தனிநபர் சுகாதாரப் பாதுகாப்பு நடைமுறைகளைப் பின்பற்றாமையும் இந்தச் திடீர் பரிசோதனையின்போது கண்டறியப்பட்டுள்ளது.
இதேவேளை, குறித்த உணவகத்துக்கு எதிராக இதற்கு முன்னரும் சுகாதாரக் குறைபாடுகள் தொடர்பில் சட்ட நடவடிக்கைகள் மேற்கொள்ளப்பட்டு வழக்குகள் தொடரப்பட்டுள்ளதாகத் தெரிவிக்கப்படுகிறது.
பொதுமக்களின் சுகாதாரத்திற்குப் பாதிப்பை ஏற்படுத்தக் கூடிய வகையில் உணவு கையாளும் நிறுவனங்கள் செயற்படுவதைத் தடுக்கும் நோக்கில், உரிய சட்ட நடவடிக்கைகள் தொடர்ந்து முன்னெடுக்கப்படும் எனத் தெரிவிக்கப்பட்டுள்ளது.
