கியூபெக் நகரில் மிதிவண்டியில் சென்றபோது வாகனம் மோதி உயிரிழந்த 11 வயதுச் சிறுவனின் நினைவாக அமைக்கவிருந்த நினைவுச் சின்ன நிகழ்வு, சமூக வலைத்தளங்களில் பரவிய வெறுப்புப் பிரசாரங்கள் காரணமாகக் கைவிடப்பட்டுள்ளது.
கியூபெக் நகரின் போபோர்ட் (Beauport) பகுதியில் கடந்த ஜூன் மாதம் மிதிவண்டியில் சென்ற 11 வயது சிறுவன் அலெக்ஸ் கோட்டே (Alex Côté), வாகனம் மோதி உயிரிழந்தான்.
இச்சம்பவம் அப்பகுதியில் பெரும் சோகத்தை ஏற்படுத்தியிருந்ததுடன், குடியிருப்புப் பகுதிகளில் குழந்தைகளின் பாதுகாப்பை உறுதி செய்யக் கோரி பெற்றோர்களும் சாலைப் பாதுகாப்பு ஆர்வலர்களும் தொடர் போராட்டங்களை முன்னெடுத்து வந்தனர்.
இந்நிலையில், விபத்து நடந்த இடத்தில் உயிரிழந்த சிறுவனின் நினைவாக வெள்ளைக் கொடியால் வர்ணம் தீட்டப்பட்ட மிதிவண்டியை நினைவுச் சின்னமாக (Ghost bike) இந்த வார இறுதியில் நிறுவ அவனது குடும்பத்தினர் திட்டமிட்டிருந்தனர்.
‘சூலியர் எத் வெலோஸ் ஃபான்டோம் கியூபெக்’ (Souliers et vélos fantômes Québec) என்ற அமைப்பின் உதவியுடன் இதற்கான ஏற்பாடுகள் செய்யப்பட்டிருந்தன.
எனினும், இந்த நிகழ்வு குறித்து சமூக வலைத்தளங்களில் கடுமையான விமர்சனங்களும், வெறுக்கத்தக்க குறுஞ்செய்திகளும் குடும்பத்தினருக்கு அனுப்பப்பட்டதாக சிறுவனின் தந்தை டொமினிக் கோட்டே (Dominic Côté) தெரிவித்துள்ளார்.
இந்த நிகழ்வு எவ்விதப் பிளவுகளுக்கும் காரணமாக அமைந்துவிடக் கூடாது என்பதற்காகவும், அமைதியான முறையில் இறுதித் திட்டங்களை முன்னெடுப்பதற்காகவும் தற்காலிகமாக இந்த ஏற்பாடு கைவிடப்படுவதாக அவர் ஃபேஸ்புக் பதிவு மூலம் அறிவித்துள்ளார்.
