ரிமோஸ்கி நகரில் சூதாட்ட இயந்திரங்களை அகற்றக் கோரிக்கை

கியூபெக் மாகாணத்தில், ரிமோஸ்கி (Rimouski) நகரில் சூதாட்ட இயந்திரங்களின் பயன்பாட்டைக் கட்டுப்படுத்த வேண்டும் என நகர மற்றும் சுகாதார அதிகாரிகள் கோரிக்கை விடுத்துள்ளனர்.

2027 ஆம் ஆண்டு Loto-Québec நிறுவனத்தின் புதிய சூதாட்ட மண்டபம் திறக்கப்படவுள்ள நிலையில், அந்நகரில் உள்ள மதுபான விடுதிகள் மற்றும் பார்களில் தொடர்ந்து இயங்கி வரும் வீடியோ லாட்டரி டெர்மினல்கள் எனப்படும் VLT சூதாட்ட இயந்திரங்கள் தொடர்பாக இந்தக் கேள்வி எழுந்துள்ளது.

ரிமோஸ்கி நகரில் தற்போது ஒன்பது நிறுவனங்களில் 57 சூதாட்ட இயந்திரங்கள் உள்ளதாகத் தெரிவிக்கப்படுகிறது.

புதிய சூதாட்ட மண்டபம் திறக்கப்படுவதற்கு முன்னதாக, பார்களில் உள்ள இந்த இயந்திரங்களின் எண்ணிக்கையைக் குறைப்பது தொடர்பாக Loto-Québec ஏற்கனவே உறுதியளித்திருந்தது.

குறிப்பாக, Bas-Saint-Laurent பிராந்தியத்தில் உள்ள சூதாட்ட இயந்திரங்களில் கணிசமான பகுதியை அகற்றுவதற்கு திட்டமிடப்பட்டிருந்ததாக நகர நிர்வாகத் தரப்பில் தெரிவிக்கப்பட்டுள்ளது.

எனினும், அக்டோபர் 22 ஆம் திகதி வரையில் ரிமோஸ்கியில் உள்ள எந்தவொரு நிறுவனத்திற்கும் இயந்திரங்களை அகற்றுவது தொடர்பான உத்தியோகபூர்வ அறிவிப்பு வழங்கப்படவில்லை என Loto-Québec உறுதிப்படுத்தியுள்ளது.

இதேவேளை, இந்த ஆண்டின் இறுதிக்குள் தற்போது ஒன்பது நிறுவனங்களில் இயங்கும் இயந்திரங்கள் ஐந்து நிறுவனங்களாகக் குறைக்கப்படும் என Loto-Québec தெரிவித்துள்ளது.

மறுபுறம், சூதாட்ட இயந்திரங்கள் அதிகளவில் கிடைப்பது மக்களின் நிதிநிலை மற்றும் மனநலத்தைப் பாதிக்கக்கூடும் என லாவல் பல்கலைக்கழகத்தின் ஆய்வாளர் அன்னி-கிளோட் சவார்ட் எச்சரித்துள்ளார்.

குறிப்பாக ஸ்லாட் இயந்திரங்கள் சூதாட்டத்துடன் தொடர்புடைய அதிக பாதிப்புகளை ஏற்படுத்தக்கூடிய விளையாட்டுகளில் ஒன்றாக இருப்பதாகவும் அவர் சுட்டிக்காட்டியுள்ளார்.

மேலும், சூதாட்ட இயந்திரங்களின் எண்ணிக்கையைத் தீர்மானிப்பதற்கு முறையான சுயாதீன ஒழுங்குமுறை அமைப்பு அவசியம் என்றும் அவர் வலியுறுத்தியுள்ளார்.

அதேநேரம், Bas-Saint-Laurent பிராந்தியத்தின் பொது சுகாதாரப் பிரிவு இயக்குநர் சில்வான் லெடுக், ரிமோஸ்கி நகரம் சூதாட்டத்திற்கான முக்கிய மையமாக மாறுவதைத் தடுக்கும் வகையில் பார்களில் உள்ள இயந்திரங்களைக் குறைக்க வேண்டும் எனக் கோரிக்கை விடுத்துள்ளார்.

புதிய சூதாட்ட மண்டபம் திறக்கப்படும் காலப்பகுதியில் நிலைமையை மீண்டும் மதிப்பீடு செய்து, தேவையான பரிந்துரைகளை முன்வைக்கப் போவதாகவும் அவர் தெரிவித்துள்ளார்.

குறிப்பாக, புதிய சூதாட்ட மண்டபம் திறக்கப்படுவதற்கு முன்னதாகவே பார்களில் உள்ள சூதாட்ட இயந்திரங்களைக் கட்டுப்படுத்த வேண்டுமா என்ற கேள்வி தற்போது கியூபெக் மாகாணத்தில் கவனத்தைப் பெற்றுள்ளது.