கியூபெக்கில் ஆட்சிப் பொறுப்பேற்றுள்ள புதிய சிறுபான்மை அரசாங்கம், பாடசாலை மாணவர்கள் மத அடையாளங்களை அணிவதைத் தடைசெய்யும் திட்டத்தை நடைமுறைப்படுத்த முனையும் நிலையில், அதற்கு மனித உரிமை அமைப்புகளும் பல்வேறு மதத் தலைவர்களும் கடுமையான கண்டனம் தெரிவித்துள்ளனர்.
கியூபெக்கின் புதிய கல்வி அமைச்சராகப் பொறுப்பேற்றுள்ள ஜோயல் அர்செனோ (Joël Arseneau), ஆரம்பப் பாடசாலை மாணவர்கள் மத அடையாளங்களை அணிவதைத் தடை செய்வது தொடர்பான தேர்தல் வாக்குறுதியில் உறுதியாக இருப்பதாகவும், அதனை விரைவாக நடைமுறைப்படுத்த நடவடிக்கை எடுக்கப்படும் என்றும் அறிவித்தார்.
இது தமது தரப்பின் பிரதான வாக்குறுதிகளில் ஒன்று எனவும், இதில் சமரசத்திற்கு இடமில்லை எனவும் புதிய கல்வி அமைச்சர் குறிப்பிட்டார்.
ஏற்கெனவே ஆட்சியில் இருந்த ‘கொஅலிசியன் அவனிர் கெபெக்’ (CAQ) அரசாங்கம், ஆசிரியர்கள் உள்ளிட்ட பொதுத்துறை ஊழியர்கள் மத அடையாளங்களை அணியத் தடை விதிக்கும் மதச்சார்பின்மைச் சட்டங்களை அமுல்படுத்தியிருந்தது.
இந்தச் சட்டத்திaற்கு எதிராகத் தாக்கல் செய்யப்பட்ட வழக்கு தற்போது நாட்டின் உச்ச நீதிமன்றத்தில் நிலுவையில் உள்ளதுடன், இதற்கான தீர்ப்பு விரைவில் எதிர்பார்க்கப்படுகிறது.
இதேவேளை, கியூபெக் அரசாங்கத்தின் இந்த நடவடிக்கைக்கு ‘கியூபெக் முஸ்லிம்களின் தேசிய பேரவை’ (CNQM) கடும் எதிர்ப்புத் தெரிவித்துள்ளது.
இது குறித்து அப்பேரவையின் தலைமைச் நிர்வாகி ஸ்டீபன் பிரவுன் (Stephen Brown) கருத்துத் தெரிவிக்கையில், இந்தத் திட்டம் சிறுபான்மையினக் குழந்தைகளின் மதச் சுதந்திரம், சமத்துவக் கல்வி உரிமை மற்றும் சமூக உரிமைகளைப் பறிப்பதாக அமைந்துள்ளது என்றும், குழந்தைகளை இரண்டாம் தரக் குடிமக்களாக நடத்தும் வகையில் இத்தகைய கொள்கைகள் காணப்படுகின்றன என்றும் கவலை வெளியிட்டுள்ளார்.
