கனடிய மத்திய அரசின் புதிய வரவுசெலவுத் திட்டத்திற்கு கியூபெக் அரசு விமர்சனம்!

மத்திய அரசினால் வெளியிடப்பட்டுள்ள புதிய வரவுசெலவுத் திட்டம் தொடர்பாகக் கியூபெக் மாகாண அரசாங்கம் தனது கடுமையான அதிருப்தியை வெளியிட்டுள்ளது.

அதேவேளை, வீடற்ற நிலைக்கு எதிரான நிதியுதவிகளைச் சுட்டிக்காட்டிய நகரசபைகளின் மேயர்கள் பலர் இந்த புதிய வரவுசெலவுத் திட்டத்திற்கு வரவேற்புத் தெரிவித்துள்ளனர்.

பிரதமர் மார்க் கார்னியினால் அறிமுகப்படுத்தப்பட்டுள்ள “நமது விதியை நிர்ணயிப்பவர்கள்” (Masters of Our Destiny) எனும் தலைப்பிலான இந்த வரவுசெலவுத் திட்டம், அடுத்த ஐந்து ஆண்டுகளில் சுமார் 142 பில்லியன் டொலர் புதிய செலவினங்களையும், 159 பில்லியன் டொலர் புதிய வருவாய் மற்றும் சேமிப்புகளையும் உள்ளடக்கியுள்ளது.

அத்துடன், 2026-27 நிதியாண்டில் 62 பில்லியன் டொலர் பற்றாக்குறை ஏற்படும் என்றும் கணிக்கப்பட்டுள்ளது.

அமெரிக்காவுடனான வர்த்தகப் போருக்கு மத்தியில் நாட்டின் பொருளாதார இறையாண்மையை வலுப்படுத்துதல், உள்நாட்டு முதலீடுகளை ஈர்த்தல் மற்றும் தேசிய பாதுகாப்பு, கலை மற்றும் கலாசாரத்தை மேம்படுத்துதல் ஆகியவற்றை முதன்மை இலக்குகளாகக் கொண்டு இந்த வரவுசெலவுத் திட்டம் தயாரிக்கப்பட்டுள்ளது.

இருப்பினும், இந்த வரவுசெலவுத் திட்டம் கியூபெக் மாகாணத்தின் முதன்மை எதிர்பார்ப்புகளைப் பூர்த்தி செய்யத் தவறிவிட்டதாகக் கியூபெக் மாகாண நிதியமைச்சர் நிகோலஸ் மார்சோ தெரிவித்துள்ளார்.

கியூபெக் மாகாணத்தின் நிதி நிலையைச் சீரமைக்கத் தமது தரப்பு போராடி வரும் வேளையில், மத்திய அரசின் இந்த வரவுசெலவுத் திட்டம் கியூபெக்கின் நிதி அமைப்பில் ஏற்படுத்தும் தாக்கத்தையும் எதிர்கொள்ள வேண்டியுள்ளதாக அவர் சுட்டிக்காட்டியுள்ளார்.

அதேவேளை, சுகாதாரத் துறைக்கான மத்திய அரசின் நிதியுதவி வளர்ச்சி விகிதம் 5 சதவீதத்திலிருந்து 3 சதவீதமாகக் குறைக்கப்பட்டுள்ளதாகப் புளொக் கியூபெக்வா (Bloc Québécois) கட்சியின் தலைவர் ஈவ்-பிரான்சுவா பிளான்ஷேட் குற்றம்சாட்டியுள்ளார்.

இதன் மூலம் கியூபெக் மாகாணத்திற்கு ஆண்டுக்கு சராசரியாக 3 பில்லியன் டொலர் இழப்பு ஏற்படும் என்பதால், தமது கட்சி இந்த வரவுசெலவுத் திட்டத்திற்கு எதிராக வாக்களிக்கும் என்றும் அறிவித்துள்ளார்.

எனினும், கனடாவில் நிலவும் வீடற்ற நிலையை எதிர்கொள்வதற்காக நான்கு ஆண்டுகளுக்கு வழங்கப்படவுள்ள 11.2 பில்லியன் டொலர் நிதியுதவித் திட்டத்திற்கு கியூபெக் மாகாணத்தில் அமைந்துள்ள பிரதான நகரங்களின் மேயர்கள் வரவேற்புத் தெரிவித்துள்ளனர்.

அதேசமயம், கியூபெக்கின் எதிர்க்கட்சிகளான கன்சர்வேடிவ், என்.டி.பி, கிரீன்ஸ் மற்றும் சிறு வணிக அமைப்புகளின் பிரதிநிதிகளும் மத்திய அரசின் இந்த வரவுசெலவுத் திட்டத்தைக் கடுமையாக விமர்சித்துள்ளமை குறிப்பிடத்தக்கது.