மொன்றியலில் இணையவழி சூதாட்டம் அதிகரிப்பு!

மொன்றியல் நகரில் ஒட்டுமொத்த சூதாட்டம் குறைந்துள்ள போதிலும், இணையவழி சூதாட்டம் (Online Gambling) குறிப்பிடத்தக்க அளவில் அதிகரித்துள்ளதாக மொன்றியல் பொதுச் சுகாதாரப் பிரிவு எச்சரித்துள்ளது.

மொன்றியல் பொதுச் சுகாதாரப் பிரிவு மற்றும் கொன்கோர்டியா பல்கலைக்கழகத்தின் சூதாட்டம் தொடர்பான ஆராய்ச்சிப் பிரிவின் தலைமை அதிகாரி சில்வியா கைரூஸ் (Sylvia Kairouz) இணைந்து வெளியிட்ட புதிய ஆய்வறிக்கையிலேயே இந்தத் தகவல்கள் தெரியவந்துள்ளன.

2025 மற்றும் 2026 ஆம் ஆண்டுகளில் 8,500 மொன்றியல் பகுதி பெரியவர்களிடம் நடத்தப்பட்ட கணிப்பீட்டின் அடிப்படையில் இந்த ஆய்வு தயாரிக்கப்பட்டுள்ளது.

இதன்படி, கடந்த எட்டு ஆண்டுகளில் இணையவழி சூதாட்டம் மூன்று மடங்கு அதிகரித்துள்ளது.

2018ஆம் ஆண்டில் 4.4 சதவீதமாக இருந்த இணையவழி சூதாட்டம், 2025 ஆம் ஆண்டில் 13.3 சதவீதமாக உயர்ந்துள்ளது.

குறுகிய காலத்தில் இவ்வளவ பெரிய உயர்வு ஏற்படுவது வழக்கத்திற்கு மாறானது என கைரூஸ் குறிப்பிட்டுள்ளார்.

அதேவேளை, குறைந்தது ஒருவகை சூதாட்டத்திலாவது ஈடுபடும் பெரியவர்களின் எண்ணிக்கை 2018 இல் 54 சதவீதமாக இருந்த நிலையில், 2025 இல் 39 சதவீதமாகக் குறைந்துள்ளது.

குறிப்பாக 18 முதல் 34 வயதுக்குட்பட்ட இளம் ஆண்கள் இணையவழி சூதாட்டங்களில் அதிகம் ஈடுபடுகின்றனர்.

இணையம் மற்றும் நேரில் விளையாடப்படும் ஸ்லாட் மெஷின்கள், விளையாட்டுப் பந்தயங்கள் (Sports betting) மற்றும் போக்கர் (Poker) போன்ற அதிக ஆபத்துள்ள விளையாட்டுகள் ஆண்களை அதிகம் ஈர்ப்பதாகக் கூறப்பட்டுள்ளது.

கடந்த 12 மாதங்களில் சூதாட்டத்தில் ஈடுபட்டவர்களிடையே சூதாட்டப் பழக்கத்திற்கு அடிமையாகும் பிரச்சனை 4.6 சதவீதமாகப் பதிவாகியுள்ளது.

இது, இதுவரை 3 சதவீதத்தைத் தாண்டியதில்லை என்பது குறிப்பிடத்தக்கது.

நிதி மற்றும் நேரத்தைச் சுயமாகக் கட்டுப்படுத்த முடியாமல் போவதே இதனால் ஏற்படும் பாதிப்புகளுக்கு முக்கியக் காரணமாகும்.

இது குறித்து கருத்து தெரிவித்துள்ள மெக்கில் பல்கலைக்கழகத்தின் இளைஞர் சூதாட்டப் பிரச்சனைகள் தொடர்பான சர்வதேச மையத்தின் பணிப்பாளர் ஜெஃப் டெரெவென்ஸ்கி (Jeff Derevensky), விளம்பரங்கள் மற்றும் பிரபலங்களின் ஆதரவு ஆகியவை நிலைமையை மோசமாக்குவதாகத் தெரிவித்துள்ளார்.

மேலும், பாடசாலைகளில் இது குறித்த விழிப்புணர்வை ஏற்படுத்த வேண்டியதன் அவசியத்தையும் அவர் வலியுறுத்தியுள்ளார்.