இஸ்ரேலுடனான 12 நாள் மோதலின் தொடக்கத்தில் விதிக்கப்பட்டிருந்த மீதமுள்ள அனைத்து கட்டுப்பாடுகளையும் ஈரான் நீக்கியுள்ளதாக அந்நாட்டின் சிவில் விமானப் போக்குவரத்து அமைப்பு அறிவித்துள்ளதாக அந்நாட்டு ஊடகங்கள் தெரிவித்துள்ளன .
உள்நாட்டு மற்றும் சர்வதேச விமான நடவடிக்கைகள் போருக்கு முந்தைய நிலைக்குத் திரும்பியுள்ளதாக ஈரானின் சிவில் விமானப் போக்குவரத்து அமைப்பு தனது வலைதளத்தில் வெளியிட்ட அறிக்கையில் தெரிவித்துள்ளதாக கூறப்பட்டுள்ளது.
தெஹ்ரானின் மெஹ்ராபாத் சர்வதேச விமான நிலையம் 24 மணி நேரமும் செயல்படத் தொடங்கியுள்ளது என்பதையும் அவ்அறிக்கை உறுதிப்படுத்தியுள்ளதாக தெரிவிக்கப்பட்டுள்ளது.
“இனிமேல், அனைத்து விமான நிறுவனங்களும் பயண நிறுவனங்களும் மீண்டும் 24 மணி நேர விமான சேவைகளையும் டிக்கெட் விற்பனையையும் வழங்க முடியும்” என்று அந்த அறிக்கையில் மேலும் கூறப்பட்டுள்ளது.
தெஹ்ரான் மற்றும் பிற பகுதிகளில் இஸ்ரேலிய வான்வழித் தாக்குதல்களைத் தொடர்ந்து ஜூன் 13 அன்று ஈரான் தனது வான்வெளியை மூடியது. 12 நாள் மோதல் ஜூன் 24 அன்று போர் நிறுத்தத்துடன் முடிந்தது.
ஈரானிய வான்வெளியை படிப்படியாக மீண்டும் திறப்பது ஜூன் 26 அன்று தொடங்கியது, விமான நிலையங்கள் படிப்படியாக இயல்பான செயல்பாடுகளைத் தொடங்கின. ஜூலை 17 அன்று, மெஹ்ராபாத் தவிர, அனைத்து விமான நிலையங்களும் முழு சேவைக்குத் திரும்பியதாக அந்நாட்டின் சிவில் விமானப் போக்குவரத்து அமைப்பு அறிவித்துள்ளதாக தெரிவிக்கப்பட்டுள்ளது.
