தொகுதி மறுவரையறை மசோதா தொடர்பாக தமிழக அரசு ஏற்பாடு செய்திருந்த அனைத்துக் கட்சி நாடாளுமன்ற உறுப்பினர்கள் கூட்டத்தில் திராவிட முன்னேற்றக் கழகம் பங்கேற்காதது குறித்து அண்ணா அறிவாலயத்தில் மக்களவை உறுப்பினர் கனிமொழி செய்தியாளர்களைச் சந்தித்து திமுகவின் நிலைப்பாட்டை விளக்கினார்.
தொகுதி மறுவரையறை மசோதா முதன்முதலில் அறிமுகப்படுத்தப்பட்ட போதே, திமுக தலைவர் மு.க.ஸ்டாலின் ஐந்து மாநில முதலமைச்சர்களைச் சென்னையில் ஒன்றிணைத்து, மக்கள் தொகை அடிப்படையில் அல்லாமல் நியாயமான முறையில் தொகுதி மறுவரையறை செய்யப்பட வேண்டும் என்ற தீர்மானத்தை நிறைவேற்றியதாக அவர் சுட்டிக்காட்டினார்.
மத்திய அரசு தற்போது அறிமுகப்படுத்த உள்ளதாகக் கூறப்படும் மசோதாவின் நகலோ அல்லது தகவல்களோ அதிகாரப்பூர்வமாகப் பகிரப்படாத சூழலில், தமிழக அரசு அவசர அவசரமாக இக்கூட்டத்தைக் கூட்டியதன் பின்னணியைக் கனிமொழி கேள்வி எழுப்பினார்.
கட்சித் தலைமைகளுக்குக் கடிதம் அனுப்பாமல், தலைமைச் செயலாளர் மூலம் தனிப்பட்ட முறையில் எம்.பி-க்களுக்கு அழைப்பு விடுத்தது முறையான நடைமுறை அல்ல என்றும் அவர் சாடினார். மேகதாது அணை விவகாரம் மற்றும் விவசாயிகள் சந்திக்கும் தீவிரப் பிரச்சினைகளிலிருந்து மக்களின் கவனத்தைத் திசைதிருப்பவே இத்தகைய கூட்டங்கள் நடத்தப்படுவதாக அவர் குற்றம் சாட்டினார்.
தேர்தலுக்குப் பின்பு யார் முதுகில் குத்தினார்கள் என்றும், யார் எட்டப்பர்களாகச் செயல்பட்டார்கள் என்றும் தமிழ்நாட்டு மக்களுக்கு மிகத் தெளிவாகவே தெரியும் எனக் குறிப்பிட்ட அவர், மேகதாது விவகாரத்தில் திமுக மற்றும் அதிமுக ஆகிய இரு கட்சிகளுமே ஒரே மாதிரியான உறுதியான நிலைப்பாட்டையே கொண்டுள்ளன என்றும் தெளிவுபடுத்தினார்.
