அமெரிக்க அரசாங்கம் கனடாவுடனான வர்த்தகக் கொள்கைகளில் மேற்கொண்டுள்ள அதிரடி மாற்றங்கள் மற்றும் புதிதாக விதிக்கப்பட்டுள்ள உயர் தீர்வை வரிகள் (Tariffs) காரணமாக, கனடாவின் கியூபெக் (Quebec) மாகாணப் பொருளாதாரம் கடுமையான சவால்களையும் பின்னடைவுகளையும் எதிர்கொள்ளும் அபாயம் ஏற்பட்டுள்ளது.
குறிப்பாக கியூபெக்கின் முதன்மை ஏற்றுமதித் துறைகளான அலுமினியம், கட்டட மரங்கள், நீர்மின்சாரம் மற்றும் உற்பத்தித் துறைகள் அமெரிக்காவின் இந்த புதிய வரிக் கொள்கையால் பெரிதும் பாதிக்கப்படவுள்ளதாக பொருளாதார வல்லுநர்களும் வர்த்தக அமைப்புகளும் எச்சரித்துள்ளன.
அமெரிக்காவின் புதிய தீர்வை வரிகளால் கியூபெக் மாகாணத்தில் மிகவும் பாதிக்கப்படக்கூடிய துறையாக அலுமினிய உற்பத்தித் துறை
அடையாளப்படுத்தப்பட்டுள்ளது. அமெரிக்காவிற்கு அதிகளவில் அலுமினியத்தை ஏற்றுமதி செய்யும் பிராந்தியங்களில் கியூபெக் முக்கிய பங்கு வகிக்கிறது.
இந்தநிலையில் புதிய வரிகளால் அமெரிக்க சந்தையில் கியூபெக் அலுமினியத்தின் விலை கணிசமாக உயர்ந்து, போட்டித்தன்மையை கியூபெக் இழக்கும் சூழல் உருவாகியுள்ளதாகக் கூறப்படுகின்றது.
மேலும், அமெரிக்காவின் நியூயோர்க் உள்ளிட்ட பல்வேறு மாநிலங்களுக்குக் கியூபெக் மாகாணம் ஏற்றுமதி செய்யும் நீர்மின்சாரத்தின் மீதான கூடுதல் வரிகள், மாகாண அரசிற்கு கிடைக்கும் வருவாயில் வீழ்ச்சியை ஏற்படுத்துவதுடன், அமெரிக்க நுகர்வோருக்கும் மின்சாரக் கட்டண உயர்வை ஏற்படுத்தும் எனக் சுட்டிக்காட்டப்பட்டுள்ளது.
