கனடாவின் கியூபெக் மாகாணத்திலுள்ள லாவால் (Laval) நகரில் வீதியோரம் நிறுத்தி வைக்கப்பட்டிருந்த வாகனம் ஒன்றிற்குத் தீவைத்த சம்பவம் தொடர்பில் சந்தேகநபர் ஒருவரைப் பொலிஸார் தேடி வருகின்றனர்.
லாவால் நகரின் சோமெடே (Chomedey) பகுதியில் உள்ள வோல்டேர் (Voltaire) மற்றும் டி வேரோன் (De Véronne) வீதிகளின் சந்தியில் வீதியோரம் நிறுத்தி வைக்கப்பட்டிருந்த வாகனமே இவ்வாறு தீக்கிரையாக்கப்பட்டுள்ளது.
சம்பவ இடத்தில் பொருத்தப்பட்டிருந்த கண்காணிப்புக் கெமராவில், கருப்பு நிற ஆடை அணிந்த இளைஞர் ஒருவர் குறித்த வாகனத்தைச் சுற்றி பல நிமிடங்கள் உலாவி திரிந்த பின்னர் திடீரென தீவைத்துவிட்டு அங்கிருந்து தப்பிச் செல்லும் காட்சிகள் பதிவாகியுள்ளன.
அவசரப் பிரிவினர் சம்பவ இடத்திற்கு விரைந்து செயல்பட்டபோதிலும், வாகனம் தீயில் கடுமையாகச் சேதமடைந்துள்ளது.
இச்சம்பவம் தொடர்பான கண்காணிப்புக் கெமரா புகைப்படங்கள் மற்றும் விபரங்களை வெளியிட்டுள்ள லாவால் பொலிஸார், சந்தேகநபரை அடையாளம் காண பொதுமக்கள் உதவுமாறு கோரிக்கை விடுத்துள்ளனர்.
