கண்டுபிடிப்பாளரும் தொழிலதிபருமான ஜி.டி. நாயுடுவின் வாழ்க்கை வரலாற்றை மையமாகக் கொண்டு, நடிகர் ஆர். மாதவன் நடிப்பில் வெளியான ‘ஜி.டி.என்’ திரைப்படம், திரையரங்குகளைத் தொடர்ந்து ஓடிடி தளத்திலும் உலகளவில் பிரம்மாண்ட சாதனை படைத்து வருகிறது.
கடந்த ஆகஸ்ட் 7ஆம் திகதி திரையரங்குகளில் வெளியான இத்திரைப்படம், நான்கு வாரங்கள் வெற்றியுடன் ஓடியது.
ஜி.டி. நாயுடுவாக நடிகர் ஆர். மாதவனின் நடிப்பும், காலனித்துவ ஆட்சிக் காலத்தில் உள்நாட்டுத் தொழில்நுட்பத்தை உருவாக்குவதற்காக அவர் எதிர்கொண்ட சவால்களும் ரசிகர்களிடையே பெரும் வரவேற்பைப் பெற்றன.
இதனைத் தொடர்ந்து, கடந்த செப்டம்பர் 4ஆம் திகதி நெட்ஃபிளிக்ஸ் ஓடிடி தளத்தில் பல்வேறு மொழிகளில் இத்திரைப்படம் வெளியானது.
வெளியான ஒரே வாரத்திற்குள் இந்தியாவில் அதிகம் டிரெண்டாகும் திரைப்படங்களின் பட்டியலில் டாப் 2 இடங்களுக்குள் முன்னேறியதுடன், தற்போது நெட்ஃபிளிக்ஸ் உலகளாவிய டாப் 10 திரைப்படங்களின் பட்டியலிலும் அதிகாரப்பூர்வமாக இடம்பிடித்துள்ளது.
குறிப்பாக, இலங்கை, ஐக்கிய அரபு அமீரகம், சிங்கப்பூர், பாகிஸ்தான் மற்றும் பஹ்ரைன் உள்ளிட்ட பல நாடுகளில் ‘டாப் 5’ தரவரிசைக்குள் இத்திரைப்படம் ஆதிக்கம் செலுத்தி வருகிறது.
இப்படத்தில் ஆர். மாதவனுடன் இணைந்து சத்யராஜ், ஜெயராம், பிரியாமணி மற்றும் துஷாரா விஜயன் உள்ளிட்ட முன்னணி நட்சத்திரங்கள் நடித்துள்ளனர்.
வலுவான கதைக்களம் கொண்ட இந்தியத் திரைப்படங்கள் ஸ்ட்ரீமிங் தளங்கள் மூலம் உலகளாவிய ரசிகர்களை எளிதாகச் சென்றடைய முடியும் என்பதற்கு ‘ஜி.டி.என்’ திரைப்படம் சிறந்த உதாரணமாகத் திகழ்கிறது என சினிமா வர்த்தக ஆய்வாளர்கள் தெரிவித்துள்ளனர்.
