தென்னாப்பிரிக்காவில் சில மணித்தியால இடைவெளியில் இடம்பெற்ற இரு வேறு துப்பாக்சிச் சூட்டுச் சம்பவங்களில் 27 பேர் உயிரிழந்துள்ளதுடன், இதில் தொடர்புடைய குற்றவாளிகளைப் பொலிஸார் தீவிரமாகத் தேடி வருகின்றனர்.
நாட்டின் ஜோகன்னஸ்பேர்க் மற்றும் கேப் டவுன் பகுதிகளுக்கு அருகிலேயே இச்சம்பவங்கள் இடம்பெற்றுள்ளன.
சட்டவிரோதச் சுரங்கத் தொழிலாளர்களுக்கிடையிலான மோதல் மற்றும் வணிக ரீதியிலான போட்டி ஆகியவையே இத் தாக்குதல்களுக்குக் காரணம் என ஆரம்பக்கட்ட விசாரணைகளில் தெரியவந்துள்ளது.
ஜோகன்னஸ்பேர்க்கிலிருந்து சுமார் 80 கிலோமீற்றர் தொலைவில் உள்ள வெடேலா (Wedela) பகுதியில் உள்ள மதுபானக் கூடம் ஒன்றில் சனிக்கிழமை மாலை ஏகே-47 ரக துப்பாக்கிகளுடன் வந்த நால்வர் நடத்திய தாக்குதலில் 17 பேர் உயிரிழந்ததுடன் 15 பேர் காயமடைந்தனர்.
சட்டவிரோதத் தங்கச் சுரங்கத் தொழில் தொடர்பான மோதலின் பின்னணியிலேயே இத் தாக்குதல் நடத்தப்பட்டுள்ளதாக பொலிஸார் சந்தேகிக்கின்றனர்.
இதேவேளை, கேப் டவுன் நகரின் புறநகர்ப் பகுதியான எல்வாண்டில் (Lwandle) ஞாயிற்றுக்கிழமை அதிகாலை 2.00 மணியளவில் இடம்பெற்ற மற்றொரு துப்பாக்கிச் சூட்டுச் சம்பவத்தில் 10 பேர் உயிரிழந்ததுடன் 11 பேர் காயமடைந்தனர்.
வணிகப் போட்டி காரணமாக இத் தாக்குதல் நடத்தப்பட்டிருக்கலாம் என பொலிஸ் அதிகாரி ஒருவர் தெரிவித்துள்ளார்.
இச் சம்பவங்கள் தொடர்பில் இதுவரை எவரும் கைது செய்யப்படவில்லை. சந்தேகநபர்களின் புகைப்படங்கள் பொலிஸாரிடம் உள்ளதாகவும், அவர்களைக் கைது செய்யத் பாதுகாப்புப் படையினர் அனைத்து நடவடிக்கைகளையும் முன்னெடுத்து வருவதாகவும் அதிபர் சிறில் ரமபோசா (Cyril Ramaphosa) தெரிவித்துள்ளார்.
