கனடாவிற்கும் ஐரோப்பிய ஒன்றியத்திற்கும் (EU) இடையே வலுவான பொருளாதார மற்றும் பாதுகாப்பு கூட்டாண்மையை உருவாக்கும் நோக்கில், மொண்ட்ரியல் நகரில் நடைபெறவுள்ள உச்சிமாநாட்டின் போது இரு தரப்பும் புதிய வரலாற்றுச் சிறப்புமிக்க கூட்டாணியை முறைப்படி அறிவிக்கத் திட்டமிட்டுள்ளன.
கியூபெக்கின் ஷெர்புரூக் நகரில் ஊடகவியலாளர்களைச் சந்தித்த பிரதமர் மார்க் கார்னி, இந்த உச்சிமாநாடு பற்றிய தகவலை வெளியிட்டார். இந்த புதிய ஒத்துழைப்பு வடிவம், குறிப்பாக கியூபெக் மாகாணத்திற்குப் பல புதிய பொருளாதார வாய்ப்புகளைத் திறப்பதுடன், நாட்டினுள் கியூபெக்கின் பங்கை மேலும் வலுப்படுத்தும் என்று அவர் வலியுறுத்தினார்.
இந்த மாத இறுதியில் மொண்ட்ரியலில் நடைபெறவுள்ள உச்சிமாநாட்டின் போது, பாதுகாப்பு, ஆற்றல், தொழினுட்பம் மற்றும் வர்த்தகம் உள்ளிட்ட பல முக்கிய துறைகளில் கனடாவும் ஐரோப்பிய ஒன்றியமும் இணைந்து செயல்படுவதற்கான மூலோபாய ஒப்பந்தம் கையெழுத்தாகவுள்ளது.
திரவமாக்கப்பட்ட இயற்கை எரிவாயு (LNG), ஹைட்ரஜன், சூரிய சக்தி, காற்றாலை மற்றும் அணுசக்தி போன்ற நம்பகமான, குறைந்த கார்பன் வெளியேற்றத்தைக் கொண்ட ஆற்றல் வளங்களை கூட்டாக இணைந்து அபிவிருத்தி செய்யவும், இதற்கான உத்திகள் மற்றும் தரநிலைகளை ஒருங்கிணைக்கவும் இரு தரப்பினரும் தீர்மானித்துள்ளனர்.
முக்கியமான கனிமங்களை வெட்டி எடுப்பதற்கான முதலீடுகளை விரைவுபடுத்துவதோடு, வெளிநாட்டுச் சந்தைகளைச் சார்ந்திருப்பதைக் குறைப்பதற்காக மூலப்பொருட்களின் மூலோபாய இருப்புக்களை உருவாக்கவும் திட்டமிடப்பட்டுள்ளது.
அத்துடன், உக்ரைனுக்கான கூட்டு ஆதரவைத் தொடர்வதுடன், இரு தரப்பின் பாதுகாப்புத் தொழில்துறைகளை ஒருங்கிணைக்கவும் உத்தேசிக்கப்பட்டுள்ளது. ஐரோப்பிய ஒன்றியத்தின் ‘SAFE’ என்ற பாதுகாப்புத் திறன் மேம்பாட்டுத் திட்டத்தில் பங்கேற்கும், ஐரோப்பிய கண்டத்திற்கு வெளியே உள்ள ஒரே நாடாக கனடா விளங்குகின்றமை குறிப்பிடத்தக்கது.
