ஒன்ராறியோவை கியூபெக்குடன் இணைக்கும் பாரிய திரவ இயற்கை எரிவாயு (LNG) செயற்றிட்டத்தை இடைநிறுத்துமாறு, கோரப்பட்டுள்ளது.
கியூபெக்கிலுள்ள மூன்று இனனு (Innu) பழங்குடி சமூகங்கள் இக்கோரிக்கையை விடுத்துள்ளன.
தங்களது பூர்வீக நிலப் பரப்புகளின் ஊடாகச் செல்லும் இச்செயற்றிட்டம் குறித்து தம்முடன் எத்தகைய ஆலோசனையும் நடத்தப்படவில்லை என அவை குற்றம் சாட்டியுள்ளன.
கிழக்கு ஒன்ராறியோவை கியூபெக்கின் கோட்-நோர் (Côte-Nord) பகுதியுடன் இணைக்கும் இப் பெருந் திட்டத்தின் ஊடாக, ஆண்டுதோறும் 15 மில்லியன் தொன் திரவ இயற்கை எரிவாயு ஐரோப்பாவிற்கு ஏற்றுமதி செய்யப்படவுள்ளது.
இதற்கான முனையமானது கியூபெக்கின் பே-கோமோ (Baie-Comeau) பகுதியில் அமைக்கப்பட உள்ளது.
இச்செயற்றிட்டமானது கியூபெக் மற்றும் ஒன்ராறியோவில் உள்ள பழங்குடிச் சமூகங்களின் பாரம்பரிய நிலங்களில், பழங்குடியினரின் சொந்த உரிமையின் கீழ் உருவாக்கப்படுவதாக ‘கினோ அஸ்கி எல்.என்.ஜி’ (Kino Aski LNG) நிறுவனம் தனது இணையத்தளத்தில் குறிப்பிட்டுள்ளது.
எனினும், கோட்-நோர் மற்றும் சகுனே லாக்-சின்-ழான் (Saguenay Lac-Saint-Jean) பகுதிகளைச் சேர்ந்த எசிபிட் (Essipit), மாஷ்டெயுயாட்ச் (Mashteuiatsh) மற்றும் பெசமிட் (Pessamit) ஆகிய மூன்று பழங்குடி சமூகங்கள் அந்த நிறுவனத்தின் கூற்றை முற்றிலுமாக மறுத்துள்ளன.
தாங்கள் இச்செயற்றிட்டத்துடன் எந்தவித ஒத்துழைப்பும் வழங்கவில்லை எனவும், இதற்கு இதுவரை தாம் இதற்கு ஒப்புதல் அளிக்கவில்லை எனவும், தங்களைப் பிரதிநிதித்துவப்படுத்த அந்த நிறுவனத்திற்கு அனுமதி வழங்கவில்லை எனவும் அந்த மூன்று பழங்குடி சமூகங்களும் தெளிவுபடுத்தியுள்ளன.
