செம்மணி மனிதப் புதைகுழி விவகாரத்திற்கு சர்வதேச விசாரணை கோரி எதிர்வரும் நவம்பர் 17ஆம் திகதி யாழ்ப்பாணத்தில் முன்னெடுக்கப்படவுள்ள கவனயீர்ப்புப் போராட்டத்திற்கு அனைத்துத் தரப்பினரும் ஆதரவு வழங்க வேண்டும் என மன்னார் மாவட்ட வலிந்து காணாமல் ஆக்கப்பட்ட உறவுகளைத் தேடும் குடும்பங்களின் சங்கத் தலைவி மனுவல் உதயச்சந்திரா கோரிக்கை விடுத்துள்ளார்.
மன்னாரில் இன்று நடைபெற்ற ஊடகவியலாளர் சந்திப்பிலேயே அவர் இந்தக் கோரிக்கையை முன்வைத்துள்ளார்.
செம்மணி மனிதப் புதைகுழியில் இதுவரை 583 மனித எலும்புக்கூடுகள் கண்டுபிடிக்கப்பட்டுள்ள நிலையில், அவை தொடர்பான அறிக்கைகளில் தெரிவிக்கப்படும் கருத்துக்கள் குறித்து அவர் சந்தேகம் வெளியிட்டுள்ளார்.
உள்நாட்டு விசாரணைப் பொறிமுறையில் தமக்கு நம்பிக்கை இல்லை எனத் தெரிவித்த அவர், சர்வதேசத் தலையீட்டின் ஊடாகவே நீதியைப் பெற்றுக்கொள்ள முடியும் என்றும் வலியுறுத்தியுள்ளார்.
எதிர்வரும் 17ஆம் திகதி காலை 10 மணிக்கு யாழ்ப்பாணம் அரியாலை தபால் கட்டைச் சந்தியிலிருந்து செம்மணி மனிதப் புதைகுழி வரை இந்தப் பேரணி முன்னெடுக்கப்படவுள்ளது.
இதில் மாணவர்கள், அரசியல் பிரதிநிதிகள், பல்கலைக்கழக மாணவர்கள் மற்றும் மனித உரிமைச் செயற்பாட்டாளர்கள் உள்ளிட்ட அனைத்துத் தரப்பினரும் கலந்துகொள்ள வேண்டும் என்றும் அவர் அழைப்பு விடுத்துள்ளார்.
