இளநிலை மருத்துவப் படிப்புகளுக்கான நீட் (NEET) பரீட்சை வினாத்தாள் கசிவு தொடர்பாகக் கைது செய்யப்பட்ட 14 பேர் மீது முறைப்படி குற்றச்சாட்டுகள் பதிவு செய்யப்பட்டுள்ளன.
கடந்த மே 3ஆம் திகதி நடைபெற்ற நீட் பரீட்சையில் சுமார் 22 இலட்சம் மாணவர்கள் தோற்றியிருந்தனர்.
குறித்த பரீட்சையின் வினாத்தாள் கசிந்தமை தெரியவந்ததையடுத்து, மே 12ஆம் திகதி தேசிய பரீட்சை முகமையினால் (NTA) அப்பரீட்சை இரத்து செய்யப்பட்டு, பின்னர் ஜூன் 21ஆம் திகதி மீள்பரீட்சை நடத்தப்பட்டது.
இவ்வினாத்தாள் கசிவு தொடர்பாக 14 பேர் கைது செய்யப்பட்டனர்.
இவர்களில் தேசிய பரீட்சை முகமையினால் வினாத்தாள் தயாரிப்புப் பணிக்காக நியமிக்கப்பட்ட மனிஷா மந்தரே, பி.வி. குல்கர்னி மற்றும் மனிஷா சஞ்சய் ஹவல்தார் ஆகிய மூன்று ஆசிரியர்களும் அடங்குகின்றனர்.
கடந்த 18ஆம் திகதி ரோஸ் அவென்யூ நீதிமன்றத்தின் விசேட நீதிபதி அஜய் குப்தா முன்னிலையில் இவர்கள் ஆஜர்படுத்தப்பட்டபோது, அவர்கள் மீது குற்றச்சாட்டுகளைப் பதிவு செய்து விசாரணையை ஆரம்பிக்குமாறு நீதிமன்றம் உத்தரவிட்டது.
நீதிபதி முன்னிலையில் ஆஜரான சந்தேகநபர்கள் தாம் குற்றமற்றவர்கள் என வாதிட்டதுடன், விசாரணையை எதிர்கொள்ளவும் இணங்கினர்.
இதன்படி, குறித்த 14 பேர் மீதும் குற்றவியல் சதி, நம்பிக்கை மோசடி, ஆதாரங்களை அழித்தல், ஊழல் தடுப்புச் சட்டம் மற்றும் பொதுப் பரீட்சைகள் (நியாயமற்ற வழிமுறைகள் தடுப்பு) சட்டம், 2024 ஆகிய பிரிவுகளின் கீழ் இன்று குற்றச்சாட்டுகள் பதிவு செய்யப்பட்டுள்ளன.
இவ்வழக்கின் சாட்சி விசாரணை எதிர்வரும் நவம்பர் 25ஆம் திகதி முதல் தினசரி அடிப்படையில் ஆரம்பமாகவுள்ளது.











