தாராபுரம் சட்டமன்றத் தொகுதி இடைத்தேர்தலை முன்னிட்டு நடைபெற்ற பிரச்சாரப் பொதுக்கூட்டத்தில் பங்கேற்று உரையாற்றிய திமுக தலைவர் மு.க.ஸ்டாலின், தமிழக வெற்றிக் கழகம் (தவெக) ஒரு அரசியல் கட்சியே அல்ல எனவும், அது ஒரு கார்ப்பரேட் மாஃபியா என்றும் கடுமையாகச் சாடியுள்ளார்.
தாராபுரம் தொகுதியில் போட்டியிடும் திமுக வேட்பாளர் சுகன்யாவை ஆதரித்துப் பிரச்சாரப் பொதுக்கூட்டத்தில் கலந்துகொள்வதற்கு முன்னதாக, பிரம்மாண்டமான ரோடு ஷோவிலும் பங்கேற்று அவர் மக்களிடம் ஆதரவு திரட்டினார்.
அதனைத் தொடர்ந்து நடைபெற்ற பொதுக்கூட்டத்தில் உரையாற்றிய அவர், தவெகவில் இன்வெஸ்டிங் பார்ட்னர், வொர்க்கிங் பார்ட்னர், ஸ்லீப்பிங் பார்ட்னர், சீக்ரெட் பார்ட்னர் எனப் பெரிய கும்பலே செயல்பட்டு வருவதாகக் குற்றம்சாட்டினார்.
அந்தப் பங்காளிகள் யார் என்பது மக்களுக்கு நன்றாகவே தெரியும் என்றும், தமிழ்நாட்டை நாசமாக்குவதே அந்தக் கும்பலின் நோக்கம் என்றும் அவர் குறிப்பிட்டார்.
மேலும், மக்கள் பிரச்சினைகளை விவாதிக்க வேண்டிய சட்டமன்றத்தின் மாண்பைச் சீர்குலைத்து, தேவையில்லாத சைகைகளைக் காட்டி அவையை நடத்துவதாக முதலமைச்சரைக் கடுமையாக விமர்சித்தார்.
“நான் மிசாவில் சந்தித்த கொடுமைகளையெல்லாம் கிண்டல் செய்யும் இடமாகச் சட்டமன்றம் மாறியுள்ளது. மக்கள் மாண்புமிகு முதலமைச்சர் என்று அழைக்கும் வகையில் நடந்துகொள்ள வேண்டுமே தவிர, Cheap Minister ஆக நடந்துகொள்ளக் கூடாது” என்றும் சாடினார்.
செய்தியாளர்களின் மைக் கண்டாலே முதலமைச்சருக்கு அலர்ஜி என்றும், தெருவிலும் சட்டமன்றத்திலும் கத்துவதைத் தவிர வேறு எதுவும் இல்லை என்றும் கூறிய ஸ்டாலின், நாடு முழுவதும் பேசப்படும் தேர்தல் ஆணையர் விவகாரம் குறித்துப் பேச முதலமைச்சர் பயப்படுவதாகக் குற்றம் சாட்டினார்.
தமிழகத்தில் எங்கு பார்த்தாலும் கொலை, கொள்ளை மற்றும் பாலியல் வன்கொடுமைகள் அதிகரித்து வருவதாகவும், தவெகவுக்கு வாக்களித்த மக்களே தற்போது புலம்பும் நிலை ஏற்பட்டுள்ளதாகவும் அவர் சுட்டிக்காட்டினார்.
