பாம்பன் மீனவர்கள் வலையில் சுமார் 350 கிலோ எடை கொண்ட மூன்று மஞ்சள் வால் கேரை மீன்கள் சிக்கியுள்ளன. இந்த மீன்கள் கிலோ ஒன்றுக்கு 180 ரூபாய் வீதம், மொத்தம் 63 ஆயிரம் ரூபாய்க்கு விற்பனை செய்யப்பட்டுள்ளன.
ராமநாதபுரம் மாவட்டம், ராமேஸ்வரத்தை அடுத்த பாம்பன் வடக்கு மீன்பிடித் துறைமுகத்திலிருந்து 50-க்கும் மேற்பட்ட நாட்டுப்படகுகளில் நூற்றுக்கணக்கான மீனவர்கள் மன்னார் வளைகுடா கடல் பகுதிக்கு மீன்பிடிக்கச் சென்றனர்.
மீன்பிடித்துவிட்டு இன்று செவ்வாய்க்கிழமை காலை கரை திரும்பிய மீனவர்களுக்கு, எதிர்பார்த்ததைவிட அதிகளவில் பல்வேறு வகையான மீன்கள் கிடைத்துள்ளன.
இந்நிலையில், பாம்பனைச் சேர்ந்த மரிய டெலிசன் என்பவருக்குச் சொந்தமான நாட்டுப்படகில் சுமார் மூன்று மீட்டர் நீளமுடைய மஞ்சள் வால் கேரை மீன்கள் மூன்று சிக்கியுள்ளன. இவற்றை கேரளாவைச் சேர்ந்த மீன் வியாபாரி ஒருவர் கிலோ ஒன்றுக்கு 180 ரூபாய் வீதம் மொத்தம் 63 ஆயிரம் ரூபாய்க்கு வாங்கிச் சென்றுள்ளார்.
கேரள மாநிலத்தில் இந்த வகை மீன்களுக்கு நல்ல வரவேற்பு இருப்பதாகவும், அரை கிலோ மற்றும் ஒரு கிலோ அளவுகளில் வெட்டி சுமார் 20 ஊர்களுக்கு விநியோகித்து விற்பனை செய்யவுள்ளதாகவும் வியாபாரி தெரிவித்துள்ளார்.
வடகிழக்கு வங்கக்கடலில் குறைந்த காற்றழுத்தப் பகுதி உருவாகியுள்ள நிலையில், கடல் சற்று சீற்றத்துடன் காணப்படுவதாகவும், கடல் நீரோட்டம் அதிகரித்துள்ளதாகவும் தெரிவிக்கப்படுகிறது. இத்தகைய சூழலிலும் அதிகளவில் மீன்கள் கிடைத்துள்ளதால் பாம்பன் மீனவர்கள் மகிழ்ச்சியடைந்துள்ளனர்.
