கியூபெக் மாகாணத்தில் நேர மாற்றத்தை ரத்து செய்வது குறித்து மீண்டும் விவாதங்கள் எழுந்துள்ளன. நாட்டில் உள்ள மற்ற பல மாகாணங்கள் பருவகால நேர மாற்ற முறையைக் கைவிட்டுவரும் நிலையில், கியூபெக் அரசாங்கம் இது தொடர்பாக என்ன முடிவுகளை எடுக்கும் என்ற எதிர்பார்ப்பு மக்களிடையே ஏற்பட்டுள்ளது.
சமீபத்தில் நடைபெற்ற மாகாணத் தேர்தல் பிரசாரத்தின்போது, பார்ட்டி கியூப்கோவா (Parti Québécois) கட்சியின் தலைவர் பால் செயிண்ட்-பியர் பிளமொண்டன் (Paul St-Pierre Plamondon), தனது அரசாங்கம் கால மாற்றத்தை ரத்து செய்வதற்குத் தயாராக இருப்பதாகத் தெரிவித்திருந்தார்.
“இந்த நடைமுறை ஆரோக்கியத்திற்கும், நேர மாற்றத்திற்கு ஏற்ப மாறுவதற்குச் சிரமப்படும் சிறுவர்களுக்கும் பயனற்றது என்பதை நாங்கள் பலமாக நம்புகிறோம்” என்று அவர் ஊடகங்களிடம் குறிப்பிட்டிருந்தார்.
இரண்டு ஆண்டுகளுக்கு முன்பு, கியூபெக் அரசாங்கம் நடத்திய இணையவழிப் பொது மக்கள் கருத்துக் கணிப்பில் பங்குபற்றியவர்களில் 90 சதவீதமானோர் இந்த நேர மாற்ற முறையைக் கைவிட வேண்டும் என்று ஆதரவு தெரிவித்திருந்தனர். ஆயினும், பொதுமக்களின் பலத்த ஆதரவு இருந்தபோதிலும், இது தொடர்பான எந்தவொரு சட்டமும் இதுவரை கொண்டுவரப்படவில்லை.
தற்போது இந்த விவகாரம் மீண்டும் விவாதிக்கப்பட்டு வரும் நிலையில், உறக்கவியல் மற்றும் பொருளாதார வல்லுநர்கள் இது குறித்துத் தங்களது கருத்துக்களைப் பகிர்ந்துள்ளனர்.
வருடத்திற்கு இருமுறை கடிகாரங்களை மாற்றுவது நமது உடல் ஆரோக்கியத்தைப் பாதிக்கிறது என்று கனடிய உறக்கவியல் ஆராய்ச்சிக் கழகத்தின் (Canadian Sleep Research Consortium) இணைத் தலைவர் ரெபேக்கா ரொபிலார்ட் (Rebecca Robillard) தெரிவித்துள்ளார்.
