எலான் மஸ்க்கை ‘மேதை’ எனப் பாராட்டிய புடின்!

ஸ்பேஸ்எக்ஸ் (SpaceX) நிறுவனத்தின் தலைவரான எலான் மஸ்க்கை ஒரு ‘மேதை’ என்று ரஷ்ய அதிபர் விளாடிமிர் புடின் பாராட்டியுள்ளார்.

அதேவேளையில், மஸ்க்கின் ஸ்டார்லிங்க் (Starlink) செயற்கைக்கோள் இணைய அமைப்புக்கு இணையான தனது சொந்த தொழில்நுட்பத்தை ரஷ்யா தற்போதுதான் தொடங்க ஆரம்பித்துள்ளது என்பதையும் அவர் ஒப்புக்கொண்டுள்ளார்.

மொஸ்கோவில் நடைபெற்ற உச்சிமாநாட்டில் ஆப்பிரிக்க தலைவர்களுடன் கலந்துகொண்ட அதிபர் புடின், டிஜிட்டல் வளர்ச்சி அமைச்சர் மக்சுத் ஷதாயேவின் (Maksut Shadayev) விளக்கக்காட்சியைக் கேட்டபோது இக்கருத்தைத் தெரிவித்தார்.

ரஷ்யா தனது சொந்த ஸ்டார்லிங்க் அமைப்பை உருவாக்கும் முயற்சியில் 30 க்கும் மேற்பட்ட செயற்கைக்கோள்களை ஏவியுள்ளதாக அமைச்சர் தெரிவித்தார்.

இதற்குப் பதிலளித்த புடின், “இது எங்களின் முதல் அடி என்பதை நான் சுட்டிக்காட்ட விரும்புகிறேன். எலான் மஸ்க் ஒரு மேதை, அவர் ஒரு நிஜமான மேதை” எனக் குறிப்பிட்டார்.

சுதந்திர கண்காணிப்பு தளமான ‘ஆர்பிட்டல் ரேடார்’ தரவுகளின்படி மஸ்க்கிடம் கிட்டத்தட்ட 10,000 குறைந்த சுற்றுவட்டப்பாதை செயற்கைக்கோள்கள் உள்ளபோதிலும், மஸ்க்கிடம் 5,000 க்கும் மேற்பட்ட செயற்கைக்கோள்கள் இயங்கி வருவதாக அமைச்சர் கூறினார்.

இதற்குப் பதிலளித்த புடின், ரஷ்யா தனது முதல் படிகளை மட்டுமே எடுத்து வைப்பதாகவும், எனினும் சுயாதீனமாக இதைத் தொடங்கியதில் பெருமையடைவதாகவும், இனி தரத்திலிருந்து எண்ணிக்கையை அதிகரிக்கும் திசையில் நகர வேண்டும் என்றும் கூறினார்.

மேலும், விண்வெளிப் பாதையில் இடையூறுகளைத் தவிர்க்கவும், ஒழுங்கைப் பேணவும் எலான் மஸ்க் உள்ளிட்ட அமெரிக்கக் கூட்டாளர்களுடன் ரஷ்யா நெருங்கிய தொடர்பில் இருப்பதாகப் புடின் தெரிவித்தார்.

ரஷ்யாவுடனான போரில் உக்ரைன் இராணுவப் பிரிவினர் ட்ரோன் நடவடிக்கைகள் மற்றும் களத் தொடர்புகளுக்கு ஸ்டார்லிங்க் அமைப்பையே பெரிதும் நம்பியுள்ளனர்.

அண்மையில் உக்ரைனில் ஸ்டார்லிங்க் வேகக் கட்டுப்பாடுகள் விதிக்கப்பட்டதால் அதிவேக ட்ரோன்களை இடைமறிப்பதில் சிக்கல்கள் எழுந்ததாக உக்ரைன் குற்றம்சாட்டியிருந்தது.

பின்னர் அது சீரானதாக உக்ரைன் தெரிவித்தபோதிலும், விதிமுறைகளை உக்ரைன் மீறியதாக மாஸ்க் குற்றம்சாட்டினார்.

ரஷ்ய அதிகாரிகள் எலான் மஸ்க்கைப் பாராட்டுவது இது முதன்முறையல்ல.

கடந்த 2025 ஆம் ஆண்டில், செவ்வாய் கிரகப் பயணத்தில் மஸ்க்குடன் இணைந்து பணியாற்ற விரும்புவதாகப் புடினின் முதலீட்டுத் தூதர் கிரில் டிமிட்ரிவ் தெரிவித்திருந்தமை குறிப்பிடத்தக்கது.