ஸ்பெயினின் டோலிடோ (Toledo) மாகாணத்தில் உள்ள உர்தா (Urda) பகுதியில் இடம்பெற்ற அதிவேக ரயில் விபத்தில் உயிரிழந்தோரின் எண்ணிக்கை 69 ஆக உயர்ந்துள்ளதாகப் பிராந்தியத் தலைவர் எமிலியானோ கார்சியா-பேஜ் (Emiliano Garcia-Page) தெரிவித்துள்ளார்.
விபத்துக்குள்ளான ரயிலின் சிதைந்த பகுதிகளை நள்ளிரவிலும் கிரேன்கள் (cranes) மூலம் அகற்றி, மீட்புக் குழுவினர் தீவிரத் தேடுதல் பணியில் ஈடுபட்டு வருகின்றனர்.
இந்த விபத்தில் 57 பேர் காயமடைந்து மருத்துவமனையில் சிகிச்சை பெற்று வருகின்றனர்.
மேலும், இவ்விபத்தில் 7 நாடுகளைச் சேர்ந்த 42 வெளிநாட்டவர்கள் பாதிக்கப்பட்டுள்ளதுடன், அவர்களில் ஒருவர் உயிரிழந்துள்ளதுடன் குறைந்தபட்சம் 7 பேர் காயமடைந்துள்ளனர்.
சிக்னல் கோளாறு காரணமாகச் சில ரயில்கள் நிறுத்தப்பட்டிருந்த நிலையில், நிறுத்தப்பட்டிருந்த ரயிலைக் கவனிக்காமல் மற்றொரு ரயிலுக்குச் செல்ல அனுமதி வழங்கப்பட்டதே இந்த விபத்துக்குக் காரணம் எனப் போக்குவரத்து அமைச்சர் ஒஸ்கார் புவெந்தே (Oscar Puente) தெரிவித்துள்ளார்.
இந்தத் தவறான அனுமதி வழங்கப்பட்டமை தொடர்பில் விசாரணைகள் ஆரம்பிக்கப்பட்டுள்ளன.
இச்சம்பவத்தைத் தொடர்ந்து ரயில்வே பாதுகாப்பைப் பலப்படுத்தக் கோரி ரயில் ஓட்டுநர்கள் சங்கத்தினர் (SEMAF) வேலைநிறுத்தப் போராட்டத்தை முன்னெடுத்துள்ளனர்.
இதனால் ரயில் சேவைகள் கடுமையாகப் பாதிக்கப்பட்டுள்ளன.
அதேவேளை, உயிரிழந்தவர்களுக்காக ஸ்பெயின் அரசு மூன்று நாட்கள் தேசிய துக்க தினத்தை அறிவித்துள்ளதுடன், வரவிருக்கும் தேர்தல் பிரச்சார நடவடிக்கைகளும் இடைநிறுத்தப்பட்டுள்ளன.
பாதிக்கப்பட்ட குடும்பங்களுக்குப் போப் லியோ (Pope Leo) தனது இரங்கலைத் தெரிவித்துள்ளார். விபத்து நடந்த பகுதியில் இருந்து 2 கிலோமீற்றர் சுற்றளவுக்குப் பொதுமக்கள் நுழையத் தடை விதிக்கப்பட்டு விசாரணைப் பணிகள் மேற்கொள்ளப்பட்டு வருகின்றன.
