பிரெஞ்சு மொழிச்சாசனத்தை மீறி, ஆங்கிலத்தில் விலைப்பட்டியல்களை வழங்கிய நிறுவனத்திற்கு அதிரடி அபராதம்.

கியூபெக் மாகாணத்தில் வணிக நடவடிக்கைகளின் போது, உத்தியோகபூர்வ மொழியான பிரெஞ்சு மொழியைப் புறக்கணித்து, ஆங்கில மொழியில் மட்டுமே வாடிக்கையாளர் விலைப்பட்டியல்களை (Invoices) வழங்கிய அழகுசாதன நிறுவனம் ஒன்றிற்கு மாகாண மொழி விழிப்புணர்வுக் கண்காணிப்பு அமைப்பு (OQLF) நிதி அபராதம் விதித்துள்ளது.

கியூபெக்கின் உத்தியோகபூர்வ மொழி கண்காணிப்பு அமைப்பு நடத்திய தீவிரத் தணிக்கை மற்றும் நுகர்வோர் புகார்களின் அடிப்படையில் இந்த நடவடிக்கை எடுக்கப்பட்டுள்ளது.

கியூபெக் மாகாணத்திற்குள் அழகுசாதனப் பொருட்களை விநியோகிக்கும் மற்றும் சந்தைப்படுத்தும் அந்த நிறுவனம், தனது வணிக ஆவணங்கள், ரசீதுகள் மற்றும் வாடிக்கையாளர் தொடர்புகளில் பிரெஞ்சு மொழியைச் சம அளவில் பயன்படுத்தத் தவறியதன் மூலம் கியூபெக்கின்’பிரெஞ்சு மொழிச் சாசனத்தை (Charter of the French Language) நேரடியாக மீறியுள்ளமை உறுதி செய்யப்பட்டுள்ளது.

கியூபெக் மாகாணத்தில் அண்மையில் பலப்படுத்தப்பட்ட Bill 96 சட்ட விதிகளின்படி, வணிக நிறுவனங்கள் தங்களின் வாடிக்கையாளர்களுக்கு வழங்கும் அனைத்துப் பரிவர்த்தனைப் பத்திரங்கள் மற்றும் ரசீதுகளில் பிரெஞ்சு மொழிக்கு முதன்மை அல்லது சமத்துவமான முக்கியத்துவத்தை வழங்க வேண்டும் என்பது கட்டாயமாக்கப் பட்டுள்ளது.

இந்த குறிப்பிட்ட அழகுசாதன நிறுவனம், உலகளாவிய ரீதியில் பாரிஸ் அடையாளங்களுடன் அழகுப் பொருட்களை விற்றாலும், கியூபெக் சந்தையில் இயங்கும்போது உள்ளூர் சட்டங்களுக்குக் கட்டுப்பட வேண்டும் எனப் பலமுறை அறிவுறுத்தப்பட்டது. ஆரம்பத்தில் நுகர்வோர் அளித்த புகாரைத் தொடர்ந்து, நிறுவனத்திற்குத் தவறைத் திருத்திக்கொள்ள உத்தியோகபூர்வ மொழி கண்காணிப்பு அமைப்பு காலக்கெடு விதித்திருந்தது.

எனினும், கணக்கியல் மற்றும் நிதித் துறைகளில் பிரெஞ்சு மொழிப் பதிப்புகளை உருவாக்க நிறுவனம் தவறியதால், இந்த விவகாரம் குற்றவியல் மற்றும் தண்டனை வழக்குத் தொடரல் திணைக்களத்திற்கு (DPCP) மாற்றப்பட்டு அபராதம் விதிக்கப்பட்டது.