கனடாவின் நீண்டகாலமாக எதிர்பார்க்கப்படும் வரி விதிமுறை சீர்திருத்தத்தை கட்டம் கட்டமாக முன்னெடுக்க பிரதமர் Mark Carney தலைமையிலான அரசாங்கம் திட்டமிட்டுள்ளதாக தெரிவிக்கப்பட்டுள்ளது.
அரசாங்கத்தின் வரவுசெலவுத் திட்ட ஆலோசனைகளில் முக்கிய பங்காற்றி வரும் Saint John—Kennebecasis தொகுதி நாடாளுமன்ற உறுப்பினரும், Canada Revenue Agency மற்றும் நிதி நிறுவனங்களுக்கான Secretary of State-உமான Wayne Long, வரி விதிமுறைகளில் மாற்றங்களை மேற்கொள்வது அரசின் முக்கிய முன்னுரிமைகளில் ஒன்றாக இருக்கும் என தெரிவித்துள்ளார்.
கனடாவின் தற்போதைய வரி முறையை எளிமைப்படுத்தி, மேலும் திறம்பட செயல்படச் செய்வதற்காக பெரிய அளவிலான சீர்திருத்தம் அவசியம் என வரி நிபுணர்கள் மற்றும் தொழில் துறை பிரதிநிதிகள் பலரும் நீண்டகாலமாக வலியுறுத்தி வருகின்றனர்.
கனடாவின் வரி விதிமுறைகள் காலப்போக்கில் தொடர்ந்து சிக்கலாகி வருவதாக Wayne Long தெரிவித்துள்ளார்.
முழுமையான வரி விதிமுறை மறுஆய்வு அவசியமா என்ற கேள்விக்கு, “முற்றிலும் அவசியம்” என அவர் தெரிவித்துள்ளார்.
சிறு மற்றும் நடுத்தர தொழில்களுக்கு தொடர்பான வரி விதிமுறைகளில் மாற்றங்கள் முன்னுரிமை பெறக்கூடும் எனவும் தெரிவிக்கப்பட்டுள்ளது.
நிதி அமைச்சர் François-Philippe Champagne உள்ளிட்ட லிபரல் நாடாளுமன்ற உறுப்பினர்கள் நாடு முழுவதும் பயணம் செய்து, இந்த கோடைக்காலத்தில் அடுத்த வரவுசெலவுத் திட்டத்துக்கான ஆலோசனைகளை நடத்தி வருகின்றனர்.
அமெரிக்காவின் வரி நடவடிக்கைகளால் கனடா பொருளாதாரம் எதிர்கொண்டுள்ள அதிர்ச்சியைத் தொடர்ந்து, முதலீடுகளை ஈர்த்து பொருளாதார வளர்ச்சியை வலுப்படுத்தும் முயற்சியின் அடுத்த கட்டமாக எதிர்வரும் இலையுதிர் கால வரவுசெலவுத் திட்டம் அமையும் என Wayne Long தெரிவித்துள்ளார்.
மேலும், கனடாவில் அதிக முதலீடு செய்ய விரும்பும் ஒரு முக்கிய சர்வதேச நிறுவனம் இருப்பதாகவும், ஆனால் கனடாவின் வரி விதிமுறைகள் மற்றும் முதலீடுகளை நிர்வகிக்கும் நடைமுறைகளில் மாற்றங்கள் செய்யப்பட்ட பின்னரே அந்த முதலீட்டை மேற்கொள்ள தயாராக இருப்பதாக அந்த நிறுவனம் தெரிவித்துள்ளதாகவும் அவர் கூறியுள்ளார்.
இதனால், கனடாவின் வரி அமைப்பை எளிமைப்படுத்தி, முதலீட்டுக்கு உகந்த சூழலை உருவாக்குவது Carney அரசாங்கத்தின் எதிர்வரும் வரவுசெலவுத் திட்டத்தில் முக்கிய இடம் பெறும் என எதிர்பார்க்கப்படுகிறது.
