தமிழ் திரையுலகில் வித்தியாசமான கதைக் களங்களைத் தேர்ந்தெடுத்து நடித்து வரும் நடிகர் அருள்நிதி, தனது அடுத்த புதிய திரைப்பட அறிவிப்பை வெளியிட்டுள்ளார்.
‘பம்பர்’ திரைப்படத்தை இயக்கி கவனத்தைப் பெற்ற இயக்குநர் செல்வக்குமார் இயக்கத்தில் உருவாகும் இந்த புதிய திரைப்படத்திற்கு ‘வேட்ட சாமி’ எனப் பெயரிடப்பட்டுள்ளது.
இப்படத்தில் முக்கியக் கதாபாத்திரத்தில் இயக்குநர் மற்றும் நடிகருமான அமீர் நடிக்க உள்ளார்.
அருள்நிதி மற்றும் அமீர் கூட்டணி முதன்முறையாக இணைவது ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது.
‘7 மைல்ஸ் பெர் செகண்ட்’ நிறுவனம் பிரம்மாண்டமாகத் தயாரிக்கும் இத்திரைப்படத்திற்கு ஜிப்ரான் இசையமைக்கிறார்.
ஒளிப்பதிவை ஆர்.டி.ராஜசேகரும், படத்தொகுப்பை ஆண்டனி எல். ரூபனும் மேற்கொள்கின்றனர்.
இப்படத்தின் மாஸான அறிமுக வீடியோவை முன்னணி இயக்குநர் லோகேஷ் கனகராஜ் தனது எக்ஸ் தளத்தில் வெளியிட்டு, படக்குழுவினருக்கு வாழ்த்துகளைத் தெரிவித்துள்ளார்.
ஆக்ஷன் கதைக் களத்தில் உருவாகும் இப்படத்தின் கூடுதல் தகவல்கள் மற்றும் நட்சத்திரங்கள் குறித்த அறிவிப்புகள் அடுத்தடுத்து வெளியாகும் என எதிர்பார்க்கப்படுகிறது.
