தமிழ் திரையுலகில் பல்துறை நடிப்புத் திறனால் முத்திரை பதித்த மூத்த நடிகர் எம்.எஸ். பாஸ்கர் முதன்மை நாயகனாக நடிக்கும் புதிய திரைப்படமான ‘விடியும் காத்திரு’ படத்தின் ஃபர்ஸ்ட் லுக் போஸ்டர் வெளியாகி ரசிகர்களிடையே பெரும் வரவேற்பைப் பெற்று வருகிறது.
ஃப்ரெண்ட்ஸ் புரொடக்ஷன் ஹவுஸ் சார்பாக பி.எம். ரவிச்சந்திரன் தயாரிக்கும் இத்திரைப்படத்திற்கு அயோத்தி வளர்மதி இணைத் தயாரிப்பாளராகப் பணியாற்றுகிறார்.
முன்னணி இயக்குநர்களான பாலா மற்றும் மிஷ்கினின் கதை விவாதங்களில் பங்காற்றி அனுபவம் பெற்ற ஆர். அரவிந்த ராஜன், இத்திரைப்படத்தின் மூலம் இயக்குநராக அறிமுகமாகிறார்.
கொலை சம்பவம் நடந்த ஒரு வீட்டிற்குள் நுழையும் இரண்டு காவல் அதிகாரிகளுக்கு அங்கே ஏற்படும் அமானுஷ்ய அனுபவங்களை மையமாகக் கொண்டு விறுவிறுப்பான மற்றும் இருக்கை நுனி க்ரைம் திரில்லர் பாணியில் இப்படத்தின் திரைக்கதை அமைக்கப்பட்டுள்ளது.
எம்.எஸ். பாஸ்கருடன் அம்ஜதா ஷெரின் முதன்மை பெண் கதாபாத்திரத்திலும், கோபி அயோத்தி காவலராகவும், பேபி ஶ்ரீஜிதா மற்றும் ராகேஷ் ஆகியோர் முக்கியக் கதாபாத்திரங்களிலும் நடித்துள்ளனர்.
சி. சத்யா இசையமைக்கும் இத்திரைப்படத்திற்கு ஜி. தாமோதரன் ஒளிப்பதிவு மற்றும் படத்தொகுப்புப் பணிகளைக் கவனிக்கிறார்.
சென்னை மற்றும் அதன் சுற்றியுள்ள பகுதிகளில் இதன் படப்பிடிப்பு முற்றிலும் நிறைவடைந்து தற்போது இறுதிக்கட்ட பணிகள் நடைபெற்று வரும் நிலையில், படத்தின் திரையரங்க வெளியீட்டுத் தேதி விரைவில் அறிவிக்கப்படும் எனப் படக்குழுவினர் தெரிவித்துள்ளனர்.
