டாடா, ஸ்டார் திரைப்படங்களின் வெற்றியைத் தொடர்ந்து நயன்தாராவுடன் இணைந்து நடித்த ‘ஹாய்’ (Hi) படத்தின் மூலமாக மக்களின் பேராதரவைப் பெற்று வரும் நடிகர் கவின், தனது 10-வது திரைப்படத்தில் தற்போது நடித்து வருகிறார்.
பிரின்ஸ் பிக்சர்ஸ் சார்பில் எஸ். லட்சுமண் குமார் தயாரிக்கும் இத்திரைப்படத்தை ‘தண்டட்டி’ பட புகழ் இயக்குநர் ராம் சங்கையா எழுதி இயக்குகிறார்.
1987-இல் உலகநாயகன் கமல்ஹாசன் நடிப்பில் வெளியாகி வெற்றி பெற்ற ‘பேர் சொல்லும் பிள்ளை’ என்ற கிளாசிக் தலைப்பே இப்படத்திற்கும் சூட்டப்பட்டுள்ளது.
தலைப்பு பழையதாக இருந்தாலும், இது தற்கால சூழலுக்கு ஏற்ப அமைக்கப்பட்டுள்ள முற்றிலும் புதிய சுவாரசியமான கிராமத்து பின்னணி கதைக் களம் கொண்ட படமாகும்.
இப்படத்தில் கவினுக்கு ஜோடியாக சமீபத்தில் வெளியாகி வசூல் சாதனை படைத்த ‘லப்பர் பந்து’ திரைப்படப் புகழ் சஞ்சனா கிருஷ்ணமூர்த்தி கதாநாயகியாக நடிக்கிறார்.
ஜூன் மாதம் பூஜையுடன் தொடங்கப்பட்ட இப்படத்தின் முதற்கட்ட படப்பிடிப்பு சென்னை மற்றும் செங்கல்பட்டை சுற்றியுள்ள கிராமப் பகுதிகளில் வெற்றிகரமாக நிறைவடைந்துள்ளது.
இதனைத் தொடர்ந்து, படத்தின் அடுத்தகட்ட முக்கிய படப்பிடிப்பு அடுத்த வாரம் மதுரையில் தொடங்கப்பட உள்ளதாகவும், அதனைத் தொடர்ந்து தேனி உள்ளிட்ட தென் மாவட்டங்களில் நடத்தத் திட்டமிடப்பட்டுள்ளதாகவும் படக்குழுவினர் தெரிவித்துள்ளனர்.
ஜஸ்டின் பிரபாகரன் இசையமைக்கும் இத்திரைப்படத்திற்கு ஆர். வேல்ராஜ் ஒளிப்பதிவும், ஜி. மதன் படத்தொகுப்பும் மேற்கொள்கின்றனர்.
முதன்முறையாக ஜோடி சேரும் கவின் – சஞ்சனா கூட்டணியின் திரை கெமிஸ்ட்ரி குறித்து சினிமா ரசிகர்களிடையே தற்போது பெரும் எதிர்பார்ப்பு உருவாகியுள்ளது.
