தமிழ்த் திரையுலகில் ‘காதலன்’, ‘மின்சார கனவு’, ‘லவ் பேர்ட்ஸ்’ மற்றும் ‘மிஸ்டர் ரோமியோ’ போன்ற மாபெரும் வெற்றிப் படங்களுக்குப் பிறகு, சுமார் 25 ஆண்டுகள் கழித்து நடனப்புயல் பிரபுதேவா மற்றும் இசைப்புயல் ஏ.ஆர்.ரஹ்மான் ஆகிய இருபெரும் ஆளுமைகள் மீண்டும் இணையும் திரைப்படத்திற்கு ‘மூன்வாக்’ எனப் பெயரிடப்பட்டுள்ளது.
திரையுலகினரிடையேயும் ரசிகர்களிடையேயும் பெரும் எதிர்பார்ப்பை ஏற்படுத்தியுள்ள இத்திரைப்படம், வரும் 2026 தீபாவளிப் பண்டிகையை முன்னிட்டு உலகம் முழுவதும் திரையரங்குகளில் வெளியாகவுள்ளதாகத் தயாரிப்பு நிறுவனம் அதிகாரப்பூர்வமாக அறிவித்துள்ளது.
முழுக்க முழுக்க நகைச்சுவை, நடனம் மற்றும் குடும்பக் கொண்டாட்டப் படமாக உருவாக்கப்பட்டுள்ள இத்திரைப்படத்தின் மூலம் பிரபல ஊடக நிறுவனமான பிகைண்ட்வுட்ஸ் (Behindwoods) அமைப்பின் தலைமைச் செயல் அதிகாரி மனோஜ் என்.எஸ் இயக்குநராக அறிமுகமாகிறார்.
இப்படத்தின் மிக முக்கியச் சிறப்பம்சமாக, ஏ.ஆர்.ரஹ்மான் இசையமைப்பதோடு மட்டுமின்றி ஒரு முக்கியக் கதாபாத்திரத்திலும் நடித்துள்ளார்.
மேலும், படத்தில் இடம்பெற்றுள்ள 5 பாடல்களையும் ஏ.ஆர்.ரஹ்மானே தனது சொந்தக் குரலில் பாடியுள்ளார் என்பது குறிப்பிடத்தக்கது.
இப்படத்தின் நகைச்சுவைக் காட்சிகளுக்கு மேலும் வலு சேர்க்கும் வகையில் பிரபல நகைச்சுவை நடிகர் யோகி பாபு 16 வித்தியாசமான வேடங்களில் நடித்து ஒரு புதிய சாதனையைப் படைத்துள்ளார்.
இவர்களுடன் அஜு வர்கீஸ், அர்ஜுன் அசோகன், ரெடின் கிங்ஸ்லி, மொட்டை ராஜேந்திரன் உள்ளிட்ட மிகப்பெரிய நட்சத்திரப் பட்டாளமே இதில் களம் இறங்கியுள்ளது.
தமிழ், தெலுங்கு மற்றும் இந்தி என மூன்று மொழிகளில் உருவாகியுள்ள இத்திரைப்படம், 2026 தீபாவளிப் ரேஸில் வெளியீட்டுத் தேதியை அதிகாரப்பூர்வமாக அறிவித்த முதல் திரைப்படமாக இணைந்துள்ளது.
