மொண்ட்ரியாலில் செய்தி சேகரித்த ஊடகவியலாளர் மீது பொலிஸார் தாக்குதல்

செய்த சேகரிப்பில் ஈடுபட்டிருந்த சுயாதீன புகைப்பட ஊடகவியலாளர் ஒருவர் மீது மொண்ட்ரியல் பொலிஸார் கடுமையாகத் தாக்குதல் நடத்தியுள்ளதாகப் புதிய குற்றச்சாட்டு எழுந்துள்ளது.

மொண்ட்ரியல் நகரில் நடைபெற்ற செயற்கை நுண்ணறிவுக்கு (AI) எதிரான போராட்டத்தின் போதே இந்தத் தாக்குதல் முன்னெடுக்கப்பட்டுள்ளது.

தான் ஊடகவியலாளர் என்பதை அடையாளம் காட்டிய போதிலும், பொலிஸார் தன்னை இலக்கு வைத்துத் தாக்கியதாக, பாதிக்கப்பட்ட
ஊடகவியலாளர் வில்லியம் வில்சன் (William Wilson) பகிரங்கமாகக் குற்றம் சாட்டியுள்ளார்.

இச்சம்பவம் தொடர்பில் சுயாதீன விசாரணை நடத்தப்பட வேண்டும் என ஊடக அமைப்புகள் மற்றும் சிவில் உரிமை அமைப்புகள் கூட்டாகக் கோரிக்கை விடுத்துள்ளன.

கடந்த 16 ஆம் திகதி மொண்ட்ரியால் நகரின் பலே டெ கொங்ரே (Palais des congrès) மையத்தில் நடைபெற்ற சர்வதேச செயற்கை
நுண்ணறிவு உச்சிமாநாட்டுக்கு எதிராக, போராட்டக்காரர்கள் ஆர்ப்பாட்டத்தில் ஈடுபட்டனர்.

இதன்போது அங்கு செய்தி சேகரிப்பில் ஈடுபட்டிருந்த ஊடகவியலாளர் வில்சன் மீது பொலிஸார் மிளகுச் சாறு (Pepper spray) தெளித்ததுடன், நிலத்தில் தள்ளி மிதித்தும், தடியடி நடத்தியும் தாக்கியதாகக் கூறப்படுகிறது.

தான் ஊடகச் சான்றிதழை (Media accreditation) கழுத்தில் அணிந்திருந்த நிலையிலும், பொலிஸார் தன்னை அடையாளம் கண்டு வேண்டுமென்றே தாக்கியதாக வில்சன் குறிப்பிட்டுள்ளார். முன்பு அறிமுகமான பொலிஸ் அதிகாரி ஒருவர் எனது பெயரைச் சொல்லி அழைத்து, லத்தியால் அடிக்கப்போவதாகக் கூறிப் பயமுறுத்தினார் என்றும், இது தன்னைத் திட்டமிட்டு இலக்கு வைத்து நடத்தப்பட்ட தாக்குதல் என்பதைக் காட்டுவதாகவும் வில்சன் தெரிவித்தார்.

தாக்குதலுக்கு இலக்கான வில்சன் உடனடியாக அவசர சிகிச்சைப் பிரிவில் அனுமதிக்கப்பட்டார். மருத்துவப் பரிசோதனைகளின்படி, அவருக்குக் தலையில் பலத்த அதிர்ச்சி (Concussion) ஏற்பட்டுள்ளதோடு, முகம், கழுத்து, முதுகுத்தண்டு, இடுப்பு
மற்றும் கைகளில் பலத்த காயங்கள் ஏற்பட்டுள்ளமை உறுதி செய்யப்பட்டுள்ளது.

மொன்றியல் பொலிஸார் முன்னெடுத்த இத்தாக்குதலால் தனக்கு வாசிப்பது, எழுதுவது மற்றும் பேசுவதில் இன்னமும் சிரமங்கள் இருப்பதாக வில்சன் வேதனை தெரிவித்துள்ளார்.

இக்குற்றச்சாட்டுகள் குறித்துப் பதிலளித்துள்ள மொண்ட்ரியால் நகரக் காவல் துறை (SPVM), சம்பவ தினத்தன்று போராட்டக்காரர்கள் தரப்பிலிருந்து பொருட்கள் வீசப்பட்டதைத் தொடர்ந்தே கூட்டத்தைக் கலைக்க நடவடிக்கை எடுக்கப்பட்டதாகக் கூறியுள்ளது.

இருப்பினும், இச்சம்பவம் தொடர்பான கோப்புகள் மறுபரிசீலனை செய்யப்படுபவதுடன், துறைசார் ஒழுக்காற்றுப் பிரிவுக்கு (Professional standards office) மேலதிக விசாரணைகளுக்காக அனுப்பி வைக்கப்பட்டுள்ளதாகப் பொலிஸ் நிர்வாகம் தெரிவித்துள்ளது.

மொண்ட்ரியலில் நடைபெறும் போராட்டங்களின் போது ஊடகவியலாளர்கள் மற்றும் ஆர்ப்பாட்டக்காரர்கள் மீது பொலிஸார்
நடத்தும் வன்முறைகள் அதிகரித்து வருவதாகவும், இநத நடத்தையானது ஒரு தொற்றுநோய் போல பரவி வருவதாகவும் ஊடக அமைப்புகள் கவலை வெளியிட்டுள்ளன.