இந்தியா மற்றும் இலங்கை இடையே அத்தியாவசிய உணவுப் பொருட்களின் விநியோகத்தை வலுப்படுத்தும் நோக்கில் முக்கிய புரிந்துணர்வு ஒப்பந்தம் ஒன்று கையெழுத்தாகியுள்ளது.
இந்தியாவின் National Cooperative Exports Limited – NCEL மற்றும் இலங்கையின் நுகர்வோர் கூட்டுறவுச் சங்கங்களின் கூட்டமைப்பு – COOPFED ஆகியவற்றுக்கு இடையிலான இந்த ஒப்பந்தம், கொழும்பில் நேற்று செவ்வாய்க்கிழமை 6ஆம் திகதி கையெழுத்தானது.
இலங்கையின் வர்த்தகம், வணிகம், உணவுப் பாதுகாப்பு மற்றும் கூட்டுறவு மேம்பாட்டுத் துறை அமைச்சர் வசந்த சமரசிங்க மற்றும் இலங்கைக்கான இந்திய உயர்ஸ்தானிகர் சந்தோஷ் ஜா ஆகியோரின் முன்னிலையில் இந்த ஒப்பந்தம் கைச்சாத்திடப்பட்டது.
இதன்படி, இந்தியாவிலிருந்து இலங்கைக்கு அத்தியாவசிய உணவுப் பொருட்களை கூட்டுறவு வலைப்பின்னல்கள் ஊடாக விநியோகிப்பதற்கான நடவடிக்கைகள் முன்னெடுக்கப்படவுள்ளன.
இதன் மூலம் அத்தியாவசியப் பொருட்களுக்கான பற்றாக்குறையை குறைத்து, நுகர்வோருக்கு மலிவு விலையில் பொருட்கள் கிடைப்பதை உறுதி செய்வதே முக்கிய நோக்கமாகும்.
அத்துடன், விவசாய மற்றும் உணவுப் பொருட்கள் விநியோகம் மட்டுமன்றி, சந்தைத் தகவல் பரிமாற்றம், சிறந்த நடைமுறைகள், திறன் மேம்பாடு, தொழில்நுட்ப ஒத்துழைப்பு, கிடங்கு மற்றும் தளவாட வசதிகள், விநியோகச் சங்கிலி மேலாண்மை மற்றும் டிஜிட்டல் தளங்கள் உள்ளிட்ட பல்வேறு துறைகளிலும் இரு தரப்பினரும் இணைந்து செயல்பட உள்ளனர்.
இந்த ஒப்பந்தம் மூலம் இந்தியா மற்றும் இலங்கையின் கூட்டுறவுத் துறைகளுக்கு இடையிலான நிறுவன ரீதியான தொடர்புகளும் மேலும் வலுப்பெறும் என எதிர்பார்க்கப்படுகிறது.
குறிப்பாக, உணவுப் பாதுகாப்பை உறுதி செய்தல், வலுவான விநியோகச் சங்கிலியை உருவாக்குதல் மற்றும் உற்பத்தியாளர்கள் முதல் நுகர்வோர் வரை அனைவருக்கும் நன்மை கிடைக்கச் செய்வதில் இந்த ஒப்பந்தம் முக்கியத்துவம் பெறுகிறது.
