ஒன்டாரியோவில் முதியோர் பராமரிப்பில் புதிய திட்டம் – அரசின் செலவைப் பாதியாகக் குறைக்க வாய்ப்பு!

கனடாவின் ஒன்டாரியோ மாகாணத்தில் முதியோர் பராமரிப்புக்கான செலவுகளைக் குறைப்பதுடன், நீண்டகால பராமரிப்பு இல்லங்களுக்காகக் காத்திருக்கும் ஆயிரக்கணக்கான முதியவர்களின் எண்ணிக்கையையும் குறைக்கக்கூடிய புதிய பராமரிப்பு முறையை விரிவுபடுத்துமாறு நிபுணர்கள் அரசாங்கத்திடம் கோரிக்கை விடுத்துள்ளனர்.

வீட்டிலேயே பராமரிப்புப் பெறுவது போதுமானதாக இல்லாத, அதேவேளை நீண்டகால பராமரிப்பு இல்லங்களில் அனுமதிக்கப்பட வேண்டிய அளவுக்கு அதிகமான உதவி இன்னும் தேவைப்படாத முதியவர்களுக்காக, மேம்படுத்தப்பட்ட உதவிபெறும் வாழ்க்கை முறை எனப்படும் Enhanced Assisted Living திட்டத்தை விரிவுபடுத்த வேண்டும் எனப் புதிய கொள்கை அறிக்கை வலியுறுத்தியுள்ளது.

வுட்கிரீன் கம்யூனிட்டி சர்வீசஸ், ஒன்டாரியோ சமூக ஆதரவு சங்கம் மற்றும் அட்வாண்டேஜ் ஒன்டாரியோ ஆகிய அமைப்புகள் இணைந்து இந்த அறிக்கையைத் தயாரித்துள்ளன.

இந்தத் திட்டம் குறித்து CBC ரொறன்ரோவிடம் கருத்துத் தெரிவித்த வுட்கிரீன் கம்யூனிட்டி சர்வீசஸின் பொது விவகாரங்களுக்கான மூத்த இயக்குநர் எரிக் மரிலியா, இத்தகைய பராமரிப்பு முறைகள் முதியவர்களுக்கு அவர்களுக்குப் பழக்கமான சமூகச் சூழலிலேயே தேவையான உதவிகளை வழங்குவதாகக் குறிப்பிட்டுள்ளார்.

மேலும், இதன் மூலம் மருத்துவமனைகள் மற்றும் நீண்டகால பராமரிப்பு இல்லங்கள் மீதான அழுத்தத்தையும் குறைக்க முடியும் என அவர் தெரிவித்துள்ளார்.

இந்த அறிக்கையில், கடந்த 20 ஆண்டுகளாக வெற்றிகரமாகச் செயல்பட்டு வரும் ஐந்து மேம்படுத்தப்பட்ட உதவிபெறும் வாழ்க்கை முறை மாதிரிகள் ஆய்வு செய்யப்பட்டுள்ளன.

அவற்றில் ஒன்றான வுட்கிரீனின் ‘கிளஸ்டர் கேர்’ முறையில், எட்டு முதல் பத்து முதியவர்கள் ஒரே வளாகத்தில் தனித்தனி அறைகளுடன் வசிக்கின்றனர். பொதுவான வரவேற்பறை மற்றும் உணவருந்தும் அறை உள்ளிட்ட வசதிகளுடன், தனிநபர் ஆதரவுப் பணியாளர்களின் உதவியும் 24 மணி நேரமும் வழங்கப்படுகிறது.

இந்த மாதிரியில், 83 சதவீத முதியவர்கள் நீண்டகால பராமரிப்பு இல்லங்களில் சேர்வதைத் தடுக்க முடிந்துள்ளதாக அந்த அறிக்கை குறிப்பிடுகிறது.

மேலும், இந்தத் திட்டங்களை மாகாணம் முழுவதும் விரிவுபடுத்துவதன் மூலம், நீண்டகால பராமரிப்பு இல்லங்களை மட்டுமே பெரிதும் நம்பியிருக்கும் தற்போதைய முறையுடன் ஒப்பிடுகையில், அரசாங்கத்துக்கும் வரிசெலுத்துவோருக்கும் ஏற்படும் செலவுகளைக் குறைக்க முடியும் என அறிக்கை சுட்டிக்காட்டுகிறது. செலவைப் பாதியாகக் குறைக்க முடியும் என்ற சாத்தியத்தையும் அது முன்வைக்கிறது.

இதற்காக, மேம்படுத்தப்பட்ட உதவிபெறும் வாழ்க்கை முறைக்கு உத்தியோகபூர்வ வரைவிலக்கணம் ஒன்றை உருவாக்குவதுடன், திட்டங்களைத் தொடர்ந்து முன்னெடுப்பதற்கான நிரந்தர நிதி ஒதுக்கீட்டையும் ஏற்படுத்த வேண்டும் என நிபுணர்கள் பரிந்துரைத்துள்ளனர்.

இதற்கிடையில், ஒன்டாரியோ சுகாதார அமைச்சின் செய்தித் தொடர்பாளர் லிலி பார்ன்ஸ் வெளியிட்ட அறிக்கையில், வீடு மற்றும் சமூகப் பராமரிப்புச் சேவைகளை வலுப்படுத்துவதற்காக இந்த ஆண்டு மாகாண அரசு 5.6 பில்லியன் டொலர் நிதியை வழங்கியுள்ளதாகக் குறிப்பிட்டுள்ளார்.

அத்துடன், சமூக வீட்டுவசதி, வீட்டுவசதி உதவி மற்றும் ஏனைய ஆதரவுச் சேவைகளுக்காக மாகாண மற்றும் கூட்டாட்சி அரசுகளின் நிதியாக சுமார் 724 மில்லியன் டொலர் ஒதுக்கப்பட்டுள்ளதாகவும் தெரிவிக்கப்பட்டுள்ளது.

எனினும், புதிய கொள்கை அறிக்கையில் முன்வைக்கப்பட்டுள்ள பரிந்துரைகள் தொடர்பாக அமைச்சின் பதிலில் நேரடியான விளக்கங்கள் இடம்பெறவில்லை.

மொத்தத்தில் முதியவர்கள் தங்களுக்குப் பழக்கமான சமூகச் சூழலில் பாதுகாப்பாக வாழ்வதற்கான வாய்ப்பை அதிகரிப்பதுடன், நீண்டகால பராமரிப்பு இல்லங்களின் காத்திருப்புப் பட்டியலையும் அரசாங்கத்தின் செலவுகளையும் குறைப்பதே இந்தத் திட்டத்தின் முக்கிய நோக்கமாகும். இந்தத் திட்டத்தை ஒன்டாரியோ அரசு எந்த அளவுக்கு விரிவுபடுத்தும் என்பது அடுத்தகட்டத்தில் கவனிக்கப்பட வேண்டிய விடயமாக உள்ளது.