அமெரிக்காவுடனான வர்த்தக மற்றும் தூதரக மோதல்கள் உச்சக்கட்டத்தை எட்டியுள்ள நிலையில், தனது சிறப்புப் படைகளுக்காக 16 “பிளாக் ஹோக்” ரக ஹெலிகொப்டர்களைக் கொள்வனவு செய்யும் திட்டத்தை கனடிய மத்திய அரசு தற்காலிகமாக நிறுத்தி வைத்துள்ளது.
அமெரிக்காவின் பாதுகாப்புத் தளபாடத் தயாரிப்பு நிறுவனமான “லாக்ஹீட் மார்ட்டின்” நிறுவனத்தின் துணை நிறுவனமான “சிகோர்ஸ்கி” தயாரிக்கும் இந்த ஹெலிகொப்டர்களை வாங்குவதற்கான பரிந்துரைக்கு அமெரிக்க வெளியுறத் துறையின் வெளிநாட்டு இராணுவ விற்பனை முகவரகம் ஏற்கனவே ஒப்புதல் அளித்துள்ளது. பின்னர் இப்பரிந்துரை அமெரிக்க நாடாளுமன்றத்தின் ஒப்புதலுக்கு அனுப்பப்படவிருந்தது.
எனினும், அமெரிக்கத் தலைநகர் வொஷிங்டனில் வர்த்தகப் பேச்சுவார்த்தைகள் தொடங்குவதற்கு முன்னரே இந்த கொள்வனவுத் திட்டத்தை நிறுத்தி வைத்ததாக மத்திய அரசாங்கம் மற்றும் பாதுகாப்புத் துறை வட்டாரங்கள் தெரிவித்துள்ளன.
அமெரிக்க ஜனாதிபதி டொனால்ட் டிரம்ப் மீண்டும் பதவியேற்றது முதல் கியூபெக் மற்றும் கனடாவின் இறையாண்மையை அடிக்கடி கேள்விக்குள்ளாகி வருவதுடன், உருக்கு, அலுமினியம் மற்றும் வாகனத் தயாரிப்புத் துறைகள் மீது வரிகளை விதித்து வர்த்தகப் போரையும் முன்னெடுத்து வருகிறார்.
இந்தச் சூழலில், அமெரிக்கா மீதான இராணுவச் சார்பைக் குறைக்கும் நோக்கில் அமெரிக்காவிலிருந்து நேரடியாக தளபாடங்களைக் கொள்வனவு செய்வதைத் தவிர்க்கும் நடவடிக்கைகளில் மத்திய அரசாங்கம் இறங்கியுள்ளது.
கனேடிய விசேட படைப்பிரிவினர் நீண்ட காலமாகப் பயன்படுத்தி வரும் “சிஎச்-146 கிரிஃபோன்” ஹெலிகொப்டர்களுக்கு மாற்றாக இந்த பிளாக் ஹோக் ரக ஹெலிகொப்டர்கள் பரிசீலிக்கப்பட்டு வந்தன.
பரந்த ஆர்க்டிக் பிராந்தியப் பகுதிகளில் நீண்ட தூரப் பயணங்களை மேற்கொள்வதற்கும், கடுமையான வானிலைச் சூழல்களை எதிர்கொள்வதற்கும் இந்த ஹெலிகொப்டர்கள் மிகவும் பொருத்தமானவை எனப் பாதுகாப்பு நிபுணர்கள் சுட்டிக்காட்டுகின்றனர்.
தற்காலிக அரசியல் கணக்குகளுக்காக நீண்டகால இராணுவத் தேவைகளைப் பலவீனப்படுத்தக் கூடாது எனச் சில நிபுணர்கள் எச்சரித்தாலும், அமெரிக்க இராணுவத் தளவாடங்களைக் கொள்வனவு செய்வதற்கு கனேடியர்கள் மத்தியில் கடும் எதிர்ப்பு நிலவுவதாகத் தரவுகள் தெரிவிக்கின்றன.
பிரதமர் மார்க் கார்னி தலைமையிலான அரசு உள்நாட்டு பாதுகாப்புத் தயாரிப்புகளை ஊக்குவிப்பதற்கும், வெளிநாட்டு நிறுவனங்களுடன் கூட்டுச் சேர்வதற்கும் முன்னுரிமை அளித்து வருவது குறிப்பிடத்தக்கது.
