அமெரிக்க இடைக்காலத் தேர்தல்களில் (midterm elections) கியூபெக் மற்றும் கனடா தரப்பிலிருந்து தேர்தல் தலையீடுகள் ஏதேனும் நடக்கிறதா என்பது குறித்து அமெரிக்க அதிகாரிகள் தீவிரமாகக் கண்காணித்து வருவதாக, கனடாவுக்கான அமெரிக்கத் தூதர் பீட் ஹோக்ஸ்ட்ரா (Pete Hoekstra) எச்சரித்துள்ளார்.
அடுத்த மாதம் நடைபெறவுள்ள முக்கியத்துவம் வாய்ந்த அமெரிக்க இடைக்காலத் தேர்தலை முன்னிட்டு, கனேடிய அரசியல்வாதிகளின் நடவடிக்கைகள் உன்னிப்பாகக் கவனிக்கப்பட்டு வருவதாகத் தெரிவித்த அவர், தேர்தல் தலையீடாகக் கருதப்படும் எவ்வித நடவடிக்கைகளுக்கும் அமெரிக்கா தகுந்த பதிலடி கொடுக்கும் என்றும் குறிப்பிட்டுள்ளார்.
கடந்த ஆண்டு ஒன்ராறியோ மாகாண அரசு ஒளிபரப்பிய அரசியல் விளம்பரங்கள் மற்றும் தொழிற்துறை அமைச்சர் மெலனி ஜோலி (Mélanie Joly), முன்னாள் பிரதமர் ஜஸ்டின் ட்ரூடோ (Justin Trudeau) ஆகியோரின் அண்மைய கருத்துகள் தேர்தல் தலையீடாகக் கருதப்படலாம் என ஹோக்ஸ்ட்ரா குற்றம் சாட்டியுள்ளார்.
குறிப்பாக, அமெரிக்காவின் வரிக் கொள்கைகளையும் பொருளாதார நடவடிக்கைகளையும் விமர்சிப்பது இரு நாடுகளுக்கு இடையிலான நட்புறவைச் சீர்குலைப்பதாக அமைந்துள்ளதாக அவர் எச்சரித்துள்ளார்.
இதன் காரணமாக, அமெரிக்க அரசியலில் கனேடியத் தலைவர்கள் தலையிட வேண்டாம் என்றும் கனடாவுக்கான அமெரிக்கத் தூதர் பீட் ஹோக்ஸ்ட்ரா கேட்டுக்கொண்டுள்ளார்.
