அமெரிக்காவில் காங்கிரஸின் கட்டுப்பாட்டைத் தீர்மானிக்கும் இடைத்தேர்தல் பிரச்சாரங்கள் இறுதி வார இறுதியை எட்டியுள்ள நிலையில், அலாஸ்காவின் முக்கிய செனட் சபை தேர்தல் குறித்தான குற்றவியல் விசாரணையை டிரம்ப் நிர்வாகம் தீவிரப்படுத்தியுள்ளது.
அலாஸ்காவில் குடியரசுக் கட்சி செனட்டர் டான் எஸ். சல்லிவனுக்கு (Dan S. Sullivan) எதிராக, அதே பெயர் கொண்ட ஓய்வுபெற்ற ஆசிரியர் டேனியல் ஜே. சல்லிவன் ஜூனியரை (Daniel J. Sullivan Jr.) வேட்பாளராகக் களமிறக்க ஜனநாயகக் கட்சிப் வேட்பாளர் மேரி பெல்டோலாவின் (Mary Peltola) உதவியாளர்கள் உதவினார்களா என்பது குறித்து கூட்டாட்சி அரசு வழக்கறிஞர்கள் விசாரணை நடத்தி வருகின்றனர்.
நியூயார்க் டைம்ஸ் நாளிதழில் வெளியான செய்தியைத் தொடர்ந்து, எஃப்.பி.ஐ (FBI) வளங்கள் அதிகளவில் இந்த விசாரணைக்கு ஒதுக்கப்பட்டுள்ளதுடன், தீவிர விசாரணைகள் நடைபெற்று வருவதாக அலாஸ்காவிற்கான அமெரிக்க வழக்கறிஞர் மைக்கேல் ஹேமேன் தெரிவித்துள்ளார்.
எனினும், வேட்பாளரைத் தேர்வு செய்ததில் தங்களுக்கு எந்தத் தொடர்பும் இல்லை என மேரி பெல்டோலா மற்றும் பிரச்சாரக் குழுவினர் மறுத்துள்ளனர்.
இதனிடையே, கலிபோர்னியாவில் 20,000 க்கும் மேற்பட்ட வாக்காளர்களின் அஞ்சல் வழி வாக்களிப்பு குறித்த விவகாரத்தை உயர் நீதிமன்றத்திற்கு (Supreme Court) எடுத்துச் செல்லவுள்ளதாக டிரம்ப் நிர்வாகம் தெரிவித்துள்ளது.
அமெரிக்காவில் செனட் சபையின் 35 இடங்களுக்கும், பிரதிநிதிகள் சபையின் 435 இடங்களுக்கும் தேர்தல் நடைபெறவுள்ளது.
தற்போது குடியரசுக் கட்சி செனட் சபையில் 53-47 என்ற கணக்கிலும், பிரதிநிதிகள் சபையில் குறைந்த பெரும்பான்மையிலும் உள்ளது.
அமெரிக்காவில் இதுவரை 51 மில்லியனுக்கும் அதிகமான வாக்காளர்கள் தங்களது வாக்குகளை முன் கூட்டியே பதிவு செய்து புதிய சாதனை படைத்துள்ளனர்.
இத்தேர்தல் செவ்வாய்க்கிழமை நடைபெறவுள்ளது.
