மட்டக்களப்பு புதூர் பகுதியில் இயங்கி வரும் 7 பேர் கொண்ட கஜன் மற்றும் குண்டன் தலைமையிலான ரவுடிக் குழுவினரின் தாக்குதலுக்கு எங்கள் மகன் உள்ளாகி பலத்த காயமடைந்த நிலையில் வைத்தியசாலை அதிதீவிர சிகிச்சைப்பிரிவில் உயிருக்காக போராடி வருகிறார்.
இந்த தாக்குதலை மேற்கொண்ட ரவுடி குழுவினர் தலை மறைவாகியுள்ளனர் எனவே இவர்களுக்கு யாரும் உதவ வேண்டாம் அதேவேளை இவர்கள் பற்றிய தகவல் தெரிந்தவர்கள், அருகிலுள்ள பொலிஸ் நிலையத்திற்கு தெரியப்படுத்துமாறு பாதிக்கப்பட்டவரின் பெற்றோர் கோரிக்கை விடுத்துள்ளனர்.
சம்பவ தினமான கடந்த மாதம் 26 ம் திகதி சேத்துக்குடா பிரதேசத்தில் இருந்து புதூருக்கு தனது மகன் சென்ற வேளை கஜன் மற்றும் குண்டன் தலைமையிலான ரவுடிக் கும்பல் மகனிடம் பணம் கேட்ட நிலையில் வாக்குவாதம் ஏட்பட்டுள்ளது.
தொடர்ந்து மகன் மீது ரவுடி கும்பல் பலத்த தாக்குதல் நடத்தியதில் அவர் இதயம் பாதிக்கப்பட்டு படுகாயமடைந்த நிலையில் மட்டு போதனா வைத்தியசாலை அதிதீவிர சிகிச்சைப்பிரிவில் அனுமதிக்கப்பட்டுள்ளார்.
இதேவேளை தாக்குதலை நடத்திய ரவுடிக் கும்பல் தலைமறைவாகிய நிலையில் அவர்களில் 3 பேரை பொலிசார் கைது செய்து ஒருவர் பிணையில் விடுவித்ததோடு இருவர் விளக்கமறியலில் வைக்கப்பட்டுள்ளார்.
இந்த குழுவின் பிரதான சூத்திரதாரிகளான கஜன், குண்டன் உட்பட்ட 4 பேர் தலைமறைவாகியுள்ளனர். இவர்கள் இந்த பிரதேசத்தில் வீதியால் செல்பவர்களை வழிமறித்து கப்பம் கோருவது கொடுக்க மறுப்பவர்களை தாக்குவது போன்ற அடாவடியில் ஈடுபட்டு வருகின்றமையால் குறித்த கும்பலை பொலிசார் வலைவீசி தேடி வருகின்றனர்.
எனவே இவர்கள் தொடர்பாக தகவல் தெரிந்தால் உடனடியாக அருகில் உள்ள பொலிஸ் நிலையத்திற்கு அறிவிக்குமாறும் இன்று எனது மகனுக்கு நடந்தது போல நாளை உங்கள் குடும்பத்தில் நடந்தால் என்ன செய்வீர்களோ அதே மாதிரி நினைத்து எங்களுக்கு உதவி செய்யுமாறு பாதிக்கப்பட்டோரின் பெற்றோர் பொதுமக்களிடம் கோரிக்கை விடுத்துள்ளனர்.
