இந்தியாவிடம் உலகின் மிகச்சிறந்த இளம் திறமையாளர்கள் உள்ளனர் என்று இந்தியக் குடியரசுத் தலைவர் திரவுபதி முர்மு தெரிவித்துள்ளார்.
டெல்லியில் நடைபெற்ற ஸ்ரீ ராம் வணிக கல்லூரியின் (SRCC) நூற்றாண்டு நிறைவு விழாவில் உரையாற்றிய அவர், இக்கல்லூரியை உதாரணமாகக் குறிப்பிட்டு முன்னணி கல்வி நிறுவனங்கள் உலகத்தரம் வாய்ந்த கற்றல் மையங்களாக மாற வேண்டும் என்று கேட்டுக்கொண்டார்.
உலகத்தரம் வாய்ந்த கல்வி நிறுவனங்கள் இந்தியாவை உலகளாவிய அறிவுசார் வல்லரசாக மாற்றும் தொலைநோக்குப் பார்வையை நனவாக்க உதவும் என்றும், நாடு முழுவதிலுமிருந்தும் வெளிநாடுகளிலிருந்தும் திறமையான மாணவர்களை ஈர்க்கும் என்றும் அவர் கூறினார்.
கடந்த பத்தாண்டுகளில் இந்தியா உலகின் மிக வேகமாக வளர்ந்து வரும் பெரிய பொருளாதாரங்களில் ஒன்றாகத் திகழ்வதைச் சுட்டிக்காட்டிய அவர், உள்கட்டமைப்பு, டிஜிட்டல் மாற்றம், நிதி உள்ளடக்கம் மற்றும் சமூக மேம்பாடு ஆகியவற்றில் குறிப்பிடத்தக்க வளர்ச்சி அடைந்துள்ளதாகக் குறிப்பிட்டார்.
உலகளாவிய நிச்சயமற்ற சூழல்கள் மற்றும் மோதல்களுக்கு மத்தியிலும் இந்த சாதனைகள் எட்டப்பட்டுள்ளன என்று அவர் தெரிவித்தார்.
உலகப் பொருளாதாரத்தில் இந்தியாவின் வளர்ந்து வரும் பங்களிப்புக்கு அதன் இளைஞர்களே உந்துசக்தியாக இருப்பார்கள் என்று கூறிய குடியரசுத் தலைவர், இந்தியா உலகின் மிகப்பெரிய இளம் மக்கள் தொகையைக் கொண்டிருப்பதோடு வலுவான திறமையாளர்களையும் கொண்டுள்ளது என்றார்.
இளைஞர்கள் தங்கள் இலட்சியங்களை “இந்தியாவைப் பற்றியது, இந்தியாவால் உருவாக்கப்பட்டது, இந்தியாவிற்கானது” என்ற அணுகுமுறையுடன் வரையறுத்து, சமூகம் மற்றும் நாட்டின் மீது தங்களுக்குள்ள பொறுப்பை உணர்ந்து செயல்பட வேண்டும் என அறிவுறுத்தினார்.
மாணவர்கள் செல்வம் படைப்பதன் மூலம் தேசத்தைக் கட்டமைப்பதிலும், குறிப்பாகப் பின்தங்கிய நிலையில் உள்ளவர்களுக்கு வாய்ப்புகளை உருவாக்குவதிலும் பங்களிக்குமாறு அவர் கேட்டுக்கொண்டார்.
மேலும், மேம்பட்ட தொழில்நுட்பங்களைப் பொறுப்புடன் பயன்படுத்த வேண்டும் என்றும், தொழில்முறை வெற்றியைப் பெறுவதுடன் மற்றவர்களிடம் அனுதாபத்துடனும் அறநெறியுடனும் நடந்துகொள்ள வேண்டும் என்றும் வலியுறுத்தினார்.
2047-ஆம் ஆண்டிற்குள் இந்தியாவை வளர்ந்த நாடாக மாற்றும் பயணத்தில் ஸ்ரீ ராம் வணிக கல்லூரி சமூகம் தொடர்ந்து பங்களிக்கும் என்றும் குடியரசுத் தலைவர் நம்பிக்கை தெரிவித்தார்.











